بەغدا - INA
نزار ئامێدی، سەرۆک کۆمار، ئەمڕۆ پێنجشەممە، لەگەڵ عەبدولمەجید تەبوون، سەرۆک کۆماری جەزائیر و محەمەد شەهابەدین، سەرۆک کۆماری بەنگلادیش، ڕێککەوت لەسەر بەهێزکردنی هاوکارییە دووقۆڵییەکان لەگەڵ عێراق لە بوارە جیاوازەکاندا.
فەرمانگەی ڕاگەیاندنی سەرۆکایەتی کۆمار لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: نزار ئامێدی، سەرۆک کۆمار، نامەیەکی پیرۆزبایی لە عەبدولمەجید تەبوون، سەرۆک کۆماری جەزائیرەوە پێگەیشت بە بۆنەی وەرگرتنی پۆستی سەرۆک کۆماری عێراق."
ئاماژەی بەوەش کرد کە سەرۆکی جەزائیر لە نامەکەیدا پیرۆزبایی و هیوای تەندروستی و سەرکەوتنی بۆ سەرۆک ئامێدی خواستووە لە جێبەجێکردنی ئەرکەکانیدا بۆ خزمەتکردنی گەلی عێراق، و جەختی لە پەرۆشی جەزائیر کردووەتەوە بۆ بەهێزکردنی پەیوەندییە برایانە و مێژووییەکانی نێوان هەردوو وڵات.
بەگوێرەی ڕاگەیەندراوەکە، سەرۆک تەبوون ئامادەیی وڵاتەکەنی دەربڕیوە بۆ کارکردن لەگەڵ عێراق بە مەبەستی پتەوکردنی هاوکاری و هاوبەشی لە بوارە جیاوازەکاندا، بە جۆرێک کە خزمەت بە بەرژەوەندی هەردوو گەلی برا بکات و سەقامگیری و گەشەپێدان لە ناوچەکەدا بەهێزتر بکات.
لە هەمان چوارچێوەدا، فەرمانگەی ڕاگەیاندنی سەرۆکایەتی کۆمار لە ڕاگەیەندراوێکی تردا ڕایگەیاند: نزار ئامێدی، سەرۆک کۆمار، نامەیەکی پیرۆزبایی لە محەمەد شەهابەدین، سەرۆک کۆماری بەنگلادیشەوە پێگەیشت بە بۆنەی دەستبەکاربوونی لە پۆستەکەیدا.
ئاماژەی بەوەش کرد کە سەرۆکی بەنگلادیش ستایشی پەیوەندییەکانی لەگەڵ عێراق کردووە و ڕۆڵی عێراقی لە ناساندنی دەوڵەتی بەنگلادیش بەرز نرخاندووە، هیوایشی خواستووە هاوکارییەکان لەسەر ئاستی دووقۆڵێ لە بوارە جیاوازەکاندا بەهێزتر بکرێن
