بەغدا ـ INA– وسام مەلا
لیژنەی دارایی لە ئەنجومەنی نوێنەران، ئەمڕۆ پێنجشەممە، ئامادەکردنی لێکۆڵینەوەیەکی تەواوی بۆ جێگیرکردنی فەرمانبەرانی گرێبەست بەبێ دروستکردنی بارگرانی دارایی بۆ گەنجینەی دەوڵەت ڕاگەیاند، هاوکات ئاماژەی بە هەبوونی ڕێککەوتنێکی نیمچە کۆتایی کرد بۆ گۆڕینی خاوەن کرێی ڕۆژانە بۆ گرێبەستی وەزاری.
عودەی عەواد، ئەندامی لیژنەکە بە ئاژانسی هەواڵی عێراقی (INA)ی ڕاگەیاند: لێکۆڵینەوەیەک ئامادەکراوە بۆ جێگیرکردنی فەرمانبەرانی گرێبەست، ئەمەش هیچ بارگرانییەکی دارایی بۆ گەنجینەی دەوڵەت دروست ناکات.
ڕوونیشیکردەوە کە مووچەی فەرمانبەران گەیشتووەتە زیاتر لە ٧ تریلیۆن دینار، ئاماژەی بەوەش کرد کە زیادکردنی فەرمانبەرانی گرێبەست بۆ سەر میلاک هیچ بارگرانییەک بۆ سەر مووچە یان بودجە زیاد ناکات، چونکە بابەتەکە تەنها گۆڕینی ناونیشانی وەزیفییە لە گرێبەستەوە بۆ میلاکی هەمیشەیی، هەندێک زیادکردنیش لە ژمارەیەک فەرمانگەدا هەیە کە دەکرێت لە ڕێگەی گواستنەوەی پارە لە نێوان بڕگەکانی خەرجیدا چارەسەر بکرێن.
سەبارەت بە کرێی ڕۆژانەش، عەواد وتی: کرێی ڕۆژانە دەگۆڕدرێت بۆ گرێبەستی وەزاری، بەتایبەتی ئەوانەی دوای ساڵی ٢٠١٩ دامەزراون، چونکە ڕێککەوتنێکی نیمچە کۆتایی هەیە بۆ گۆڕینیان بۆ گرێبەستی وەزاری.
ئەو ئەندامەی لیژنەی دارایی لە درێژەی قسەکانیدا وتی: ئاسایشی دارایی سەقامگیرە، بەڵام ناردنی بودجە لەلایەن حکومەتی نوێوە زەمینەی یاسایی بۆ قەرزکردن دابین دەکات، جگە لە زیادکردنی داهاتە نانەوتییەکان و چارەسەرکردنی دۆسیەی داهاتە نانەوتییەکان لەگەڵ هەرێمی کوردستان.
