هەولێر- INA- ئیڤان ناسر
زانکۆی جیهان لە هەولێر، ئەمڕۆ پێنجشەممە، پێشانگایەکی شێوەکاریی بۆ هونەرمەند شەماڵ سەعدوڵڵا کردەوە، بە بەشداریی ٢٠ تابلۆی هونەری کە بۆ یەکەمجار نمایش دەکران.
هونەرمەندی شێوەکار سەعدوڵڵا بە ئاژانسی هەواڵی عێراقی (INA)ی ڕاگەیاند: زانکۆی جیهان لە هەولێر پێشانگایەکی شێوەکاریی کردەوە کە تێیدا ٢٠ تابلۆی هونەری بۆ یەکەمجار نمایش کران، پێشانگاکە ناونیشانی 'بیم'ی هەڵگرتووە کە بە مانای 'تیشک' دێت و بە زمانی کوردیش بە واتای 'ترس و دڵەڕاوکێی زۆر' دێت. ئاماژەی بەوەش کرد کە پێشانگاکە گوزارشتە لە دیالۆگێکی بینراو لە نێوان شێوە کۆنەکان و دووکەڵی جەنگ، و ڕەنگدانەوەی کاریگەریی واقیعی کۆمەڵایەتیی ئێستایە لەسەر دەروونی خەڵک.
وتیشی: کارەکانی پێشانگاکە باسیان لە دڵەڕاوکێی قووڵ و ترسی بەکۆمەڵ کردووە کە لە ئەنجامی جەنگەکان و بەکارهێنانی چەکی ئەتۆمی دروست دەبێت، تابلۆکانیش بە شێوازی 'تەجریدی تەعبیری' جێبەجێ کراون، لەگەڵ بەکارهێنانی ڕەنگ و تەکنیکی هونەریی هاوچەرخ کە لەگەڵ کەشی بابەتە پێشکەشکراوەکاندا دەگونجێن.
ڕوونیشیکردەوە: بە ئەنقەست نەمویستووە بچمە ناو وردەکاریی ڕوونکردنەوەی تابلۆکان، بۆ ئەوەی بوار بۆ بینەران بڕەخسێنم بەگوێرەی تێڕوانینی تایبەتی خۆیان کارلێکی لەگەڵدا بکەن، جەختیشی کردەوە کە مەترسی و دڵەڕاوکێی خەڵک لە هەڵگیرسانی جەنگ، پاڵنەری سەرەکی بووە بۆ سازکردنی پێشانگاکە و بەرجەستەکردنیان بە شێوەیەکی بینراو.
سەعدوڵڵا ستایشی ڕۆڵی زانکۆی جیهانی کرد لە پاڵپشتیکردنی چالاکییە هونەری و ڕۆشنبیرییەکان و ڕەخساندنی هەل بۆ خوێندکاران تا لە نزیکەوە ئاشنای ئەزموونە شێوەکارییەکان بن، هیوایشی خواست کارەکانی لە پارێزگاکانی تری عێراق نمایش بکات، بۆ ئەوەی لە خەڵکەوە نزیک بن و گوزارشت لەوان بکەن.
لای خۆشیەوە، زیاد کەریم، بەڕێوەبەری ڕۆشنبیری و ڕاگەیاندن لە زانکۆی جیهان، بە ئاژانسی هەواڵی عێراقی (INA)ی ڕاگەیاند: کارگێڕیی زانکۆ و سەرۆکەکەی گرنگییەکی زۆر بە هونەر و ڕۆشنبیری و ڕاگەیاندن دەدەن، لە ڕێگەی ڕێکخستنی پێشانگا، سیمینار، فێستیڤاڵ، چاپکردنی کتێب و نمایشە شانۆیی و سینەماییەکان، ئاماژەی بەوەش کرد کە ئەم چالاکییانە ئامانجیان دۆزینەوە و پاڵپشتیکردنی بەهرەی خوێندکارانە لە بوارە جیاوازەکاندا.
ئاماژەی بەوەش کرد کە زانکۆ پێشتر میوانداریی پێشانگای چەندین هونەرمەندی عێراقی کردووە، داواشی لە هونەرمەندان کرد بە هەموو پسپۆڕییە جیاوازەکانەوە چالاکییە هونەری و ڕۆشنبیرییەکانیان لە ناو زانکۆدا ئەنجام بدەن.
