بەغداد - INA
جێگری یەکەمی سەرۆکی ئەنجومەنی نوێنەران، عەدنان فەیحان دلێمی، ئەمڕۆ چوارشەممە داوای لە دەستەی ڕاگەیاندن و پەیوەندییەکان کرد کە جومگە جیاوازەکانی کارە میدیاییەکان بە جۆرێک ڕێکبخەن کە لەگەڵ دابونەریت و بەهاکانی کۆمەڵگەدا بگونجێت.
نووسینگەی ڕاگەیاندنی جێگری یەکەمی سەرۆکی ئەنجومەنی نوێنەران، لە بەیاننامەیەکدا کە بۆ ئاژانسی هەواڵی عێراقی ناردوە، ڕایگەیاند: "عەدنان فەیحان دلێمی، جێگری یەکەمی سەرۆکی ئەنجومەنی نوێنەران، لە نووسینگەی خۆی پێشوازی لە بلاسم سالم، سەرۆکی ئەنجومەنی کۆمیسیارانی دەستەی ڕاگەیاندن و پەیوەندییەکان و ئەندامانی کۆمیسیۆنەکە کرد؛ ئەمەش لە چوارچێوەی بەدواداچوون بۆ کارەکانی دەستەکە و ئاگاداربوون لە گرنگترین ئەو ئاستەنگانەی ڕووبەڕوویان دەبێتەوە، جگە لە تاوتوێکردنی ئەو یاسایانەی پێویستن بۆ بەهێزکردنی ڕۆڵی چاودێری و ڕێکخستنی دەستەکە."
بەپێی بەیاننامەکە، فەیحان جەختی کردووەتەوە کە "دەسەڵاتی یاسادانان بەهێزکردنی سەربەخۆیی دەستەکان دەخاتە پێشینەی کارەکانی، بە جۆرێک کە بەشداربێت لە چالاککردنی ڕۆڵیان"، هەروەها داوای لە دەستەی ڕاگەیاندن و پەیوەندییەکان کرد "جومگە جیاوازەکانی کارە میدیاییەکان بە جۆرێک ڕێکبخەن کە لەگەڵ دابونەریت و بەهاکانی کۆمەڵگەدا بگونجێت."
ناوبراو ئاماژەی بەوەشکرد: کە "ئەمە ئەرکێکی شەرعی، ئەخلاقی، نیشتمانی و پیشەییە"، هەروەها پەیمانگای مەشق و گەشەپێدانی پەرلەمانی ڕاسپارد بۆ "ڕێکخستنی وۆرک شۆپێکی هاوبەش کە وەزارەتی پەیوەندییەکان، دەستەی ڕاگەیاندن و پەیوەندییەکان، تۆڕی ڕاگەیاندنی عێراقی، لایەنە ئەمنییەکان و لیژنە پەیوەندیدارەکانی پەرلەمان لەخۆبگرێت؛ بە ئامانجی پێگەیاندنی یاسا پەیوەندیدارەکان و چارەسەرکردنی تێکهەڵچوونی دەسەڵاتەکانی نێوان وەزارەت و دەستەکە."
