بەغدا – INA – ئەحمەد فەراجی
ئەمڕۆ دووشەممە، وەزیری خوێندنی باڵا و توێژینەوەی زانستی بە وەکالەت، هەڵۆ عەسکەری، دەستپێکردنی چوارەمین وەشانی بەرنامەی "لە عێراق بخوێنە" (Study in Iraq) ی ڕاگەیاند، هاوکات ئاماژەی بە تەرخانکردنی ئەوپەڕی تواناکان کرد بۆ دابینکردنی ژینگەیەکی فێرکاری بە پێوەرە نێودەوڵەتییەکان.
عەسکەری لە وتارێکدا بەبۆنەی دەستپێکردنی چوارەمین وەشان لە چوارچێوەی بەرنامەی "لە عێراق بخوێنە" کە پەیامنێری ئاژانسی هەواڵی عێراقی (INA) ئامادەی بوو، ڕایگەیاند: "ئەمڕۆ بەرنامەی 'لە عێراق بخوێنە' بۆ ساڵی خوێندنی 2026 / 2027 لە چوارەمین وەشانی خۆیدا لە چوارچێوەی چوارەمین سکۆلارشیپ (مەنحە) دەستیپێکرد"، ڕوونیشیکردەوە کە "سکۆلارشیپەکە تایبەتە بە قوتابیانی نێودەوڵەتی کە ئارەزووی خوێندن لە زانکۆ عێراقییەکان دەکەن لە پسپۆڕییە جیاوازە زانستی و مرۆییەکاندا".
ئاماژەی بەوەشکرد: "پلاتفۆرمی ئەلیکترۆنی 'لە عێراق بخوێنە' لەبەردەم قوتابیانی نێودەوڵەتی داواکار بۆ بەرنامەکانی خوێندنی بەرایی (بە کالۆریۆس) کراوەیە، لە ئەمڕۆوە کە دەكاتە 4ی ئایاری 2026 تا کۆتایی مانگی تەممووز، و بۆ بەرنامەکانی خوێندنی باڵاش تا کۆتایی مانگی ئەیلوولی داهاتوو بەردەوام دەبێت".
ئاماژەی بەوەش کرد: "بە پشتبەستن بەو سەرکەوتنانەی بەرنامەی 'لە عێراق بخوێنە' بەدەستهێناوە لە وەرگرتنی زیاتر لە 5 هەزار قوتابی نێودەوڵەتی لە 60 ڕەگەزنامەی جیاوازی وڵاتانی جیهانەوە، خواستی چوارەمین وەشان بۆ ساڵی خوێندنی 2026 / 2027 تەنیا لە پاراستنی ئاستی وەرگرتنی ساڵانی ڕابردوو کورت نابێتەوە، بەڵکو بەرەو بەهێزکردنی هەمەجۆریی ئەکادیمی و ڕۆشنبیری هەنگاو دەنێت".
هەروەها دەستخۆشی لە "بەردەوامیی ئەم بەرنامە زیندووە کرد وەک بەرجەستەکردنێکی زانستی بۆ ئەو سیاسەتە ئەکادیمییەی کە لە ڕێڕەوی نێودەوڵەتیکردندا پەیڕەو کراوە و پەنجەرەیەکی ستراتیژییە بۆ ڕاکێشانی قوتابیانی نێودەوڵەتی بۆ ناو زانکۆ دێرینەکانمان"، ئاماژەی بەوەش کرد کە "وەزارەتی خوێندنی باڵا و توێژینەوەی زانستی بەردەوامە لە تەرخانکردنی ئەوپەڕی تواناکانی بۆ دابینکردنی ژینگەیەکی فێرکاری بە پێوەرە نێودەوڵەتییەکان کە بەشدار بێت لە گەشەپێدانی تواناکان و پەرەپێدانی بەرنامەکان و هاوتابوون لەگەڵ گۆڕانکارییە خێراکان لە مەیدانەکانی مەعریفەی زانستیدا".
