بەغدا -INA - ئەحمەد فەراجی
وەزارەتی تەندروستی، ئەمڕۆ پێنجشەممە، نزیکبوونەوەی خستنەگەڕی سیستەمی ئەلیکترۆنیی دڵنیایی تەندروستی لە بەغدا ڕاگەیاند.
عەلی ئەحمەد عوبێد، بەڕێوەبەری گشتی سندوقی دڵنیایی تەندروستی لە وەزارەت بە ئاژانسی هەواڵی عێراقی (INA)ی ڕاگەیاند: وەزارەتی تەندروستی و دەستەی دڵنیایی تەندروستی، کاریان لەسەر تەواوکردنی سیستەمی ئەلیکترۆنیی گشتگیری تایبەت بە دڵنیایی تەندروستی کردووە، ئەمەش لە چوارچێوەی هەنگاوەکانی ئۆتۆماتیککردن و بەدیجیتاڵکردنە بە شێوەیەکی تەواو، و لە ماوەی چەند ڕۆژی کەمی داهاتوودا دەخرێتە گەڕ.
ڕوونیشیکردەوە کە سیستەمەکە پشت بە کارتە بایۆمەترییەکان دەبەستێت کە گوزارشت لە دۆسیەی پزیشکیی ئەو کەسانە دەکات کە دڵنیایی تەندروستی دەیانگرێتەوە، ئاماژەی بەوەش کرد کە ئەم کارتە چاپ کراون و بەسەر ژمارەیەکی زۆر لەو فەرمانگە و بەڕێوەبەرایەتییانەدا دابەش کراون کە دڵنیایی تەندروستی دەیانگرێتەوە.
وتیشی: کارکردن بەردەوامە بۆ گۆڕینی دەفتەرە کاغەزییەکان بە کارتە ئەلیکترۆنییەکان، و بڕیارە لە چەند ڕۆژی داهاتوودا سیستەمەکە سەرەتا لە پارێزگای بەغدا بخرێتە گەڕ، و دواتر بەدوای یەکدا لە پارێزگاکانی تریش کە یاسای دڵنیایی تەندروستی دەیانگرێتەوە، گشتگیر بکرێت
