بەغدا - INA
کۆمپانیای هەڵکەندنی عێراقی، ئەمڕۆ پێنجشەممە، تەواوکردنی هەڵکەندنی بیرێکی نەوتی ئاسۆیی بە قووڵایی ٣٩٠٢ مەتر لە ڕۆژهەڵاتی بەغدا ڕاگەیاند.
کۆمپانیاکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: کارەکانی هەڵکەندنی بیری نەوتی ئاسۆیی EBS-149 لە کێڵگەی ڕۆژهەڵاتی بەغدای باشوور تەواوکرا، بە قووڵایی ٣٩٠٢ مەتر، لە ڕێگەی بەکارهێنانی ئامێری هەڵکەندنی IDC-36، بەپێی بەرنامەیەکی کاری تەکنیکی کە ڕەچاوی پێداویستییەکانی هەڵکەندنی ئاسۆیی و تایبەتمەندیی پێکهاتە جیۆلۆجییەکانی کێڵگەکەی کردووە.
ئەوەشی خستەڕوو کە ئەم کارانە لە چوارچێوەی ئەو گرێبەستەدایە کە لەگەڵ کۆمپانیای EBSی چینی واژۆکراوە بۆ هەڵکەندنی ١٨ بیری ئاسۆیی لە هەمان کێڵگەدا، و بە هاوکاری کۆمپانیای COSL بۆ خزمەتگوزارییە نەوتییەکان، لە چوارچێوەی پلانەکانی پەرەپێدانی کێڵگەکە و بەرزکردنەوەی ئاستی بەرهەمهێنان.
بەگوێرەی ڕاگەیەندراوەکە، محەمەد حەنتووش ئەسەد ئەزیرجاوی، بەڕێوەبەری گشتی کۆمپانیای هەڵکەندنی عێراقی وتی: ئەم بیرە دوایین بیری ناو پڕۆژەی هەڵکەندنی ١٨ بیری ئاسۆییە، بە تەواوکردنیشی ستافە تەکنیکی و ئەندازیارییەکانی کۆمپانیاکە جێبەجێکردنی تەواوی پڕۆژەکەیان بە سەرکەوتوویی کۆتایی پێهێناوە، ئەمەش ڕەنگدانەوەی ئاستی لێهاتوویی تەکنیکی و توانای بەرزی کارکردنە کە کۆمپانیاکە لە جێبەجێکردنی پڕۆژە پسپۆڕییەکانی هەڵکەندندا هەیەتی.
ڕوونیشیکردەوە کە تەواوکردنی ئەم پڕۆژەیە وێستگەیەکی گرنگ بوو کە چووە سەر تۆماری سەرکەوتنە بەردەوامەکانی کۆمپانیاکە لە پڕۆژەکانی هەڵکەندنی ئاسۆیی، و بە واژۆکردنی گرێبەستێکی نوێ لەگەڵ کۆمپانیای EBS بۆ هەڵکەندنی ١٧ بیری ئاسۆیی دیکە لە هەمان کێڵگەدا کۆتایی هات، لەگەڵ ئامادەکاری بۆ دەستپێکردنی جێبەجێکردنی پڕۆژەکە لە کاتە دیاریکراوەکاندا وەک پاڵپشتییەک بۆ پلانەکانی پەرەپێدانی کێڵگەکە و بەرزکردنەوەی بەرهەمی نیشتمانی
