بەدواداچوون – INA
داواکارییەکان بۆ بەدەستهێنانی بیمەی بێکاری لە ویلایەتە یەکگرتووەکان لە ماوەی هەفتەی ڕابردوودا بەرزبوونەوەیەکی کەمی تۆمارکرد، ئەمەش نیشاندەری بەردەوامیی سەقامگیرییەکی ڕێژەیی بازاڕی کارە لەم مانگەدا، سەرەڕای ئەو تەحەدا ئابوورییانەی کە بەهۆی ململانێ هەرێمییەکان و بەرزبوونەوەی نرخەکانەوە دروست بوون.
وەزارەتی کاری ئەمریکا لە ڕاپۆرتێکدا ئەمڕۆ پێنجشەممە ڕایگەیاند: داواکارییە سەرەتاییەکان بۆ بیمەی بێکاریی حکومی بە بڕی ٦ هەزار داواکاری زیادی کردووە و گەیشتووەتە ٢١٤ هەزار داواکاری بۆ ئەو هەفتەیەی کە لە ١٨ی نیسان کۆتایی هاتووە، ئاماژەی بەوەش کردووە ئەم ژمارەیە لە پێشبینییەکان زیاتر بوو کە چاوەڕوان دەکرا ٢١٠ هەزار داواکاری بێت.
لێکەوتەکانی جەنگ و وزە
ڕاپۆرتەکە ڕوونی کردووەتەوە کە سەرەڕای پەککەوتنی کەشتیوانی لە گەرووی هورمز و بەرزبوونەوەی نرخی نەوت و کاڵا سەرەکییەکانی وەک پەین و ئەلەمنیۆم بەهۆی جەنگی ئەمریکا و ئیسرائیل لەگەڵ ئێران، بەڵام تا ئێستا هیچ نیشانەیەک بۆ دەرکردنی بەکۆمەڵی کرێکاران نییە، ئاماژەی بەوەش کردووە داخرانی فیعلیی گەرووەکە لەلایەن تارانەوە لە ٢٨ی شوباتەوە، ترسی لایەنەکانی لە لێکەوتی فراوانتر بۆ سەر زنجیرەکانی دابینکردنی جیهانی و بازاڕی کار دروست کردووە.
دیمەنی سیاسی و وەزیفەکان
لە هەمان چوارچێوەدا، دۆناڵد ترەمپ سەرۆکی ئەمریکا، ڕۆژی سێشەممەی ڕابردوو درێژکردنەوەی ئاگربەستی لەگەڵ ئێران بۆ ماوەیەکی نادیار ڕاگەیاند، لەگەڵ بەردەوامیی سنووردارکردنی دەریایی لەسەر بەندەرە ئێرانییەکان، ئەم هەنگاوانەش لە کاتێکدا دێن کە سیاسەتە ئابوورییەکانی پێشوو وەک سەپاندنی ڕەسمی گومرگی و توندکردنەوەی ڕێکارەکانی کۆچبەری، بوونە هۆی خاوبوونەوەی گەشەی بازاڕ.
داتا فەرمییەکان ئاماژە بەوە دەکەن کە هەلی کاری ناکشتوکاڵی لە مانگی ئازاردا بە بڕی ١٧٨ هەزار وەزیفە گەشەی کردووە، دوای دابەزینێکی توند کە لە مانگی شوباتدا گەیشتە ١٣٣ هەزار وەزیفە، ئەمەش ڕەنگدانەوەی هەڵبەز و دابەزە لە ئەدای کۆمپانیاکان و دوودڵی لە فراوانکردنی دامەزراندندا.
نیشاندەرە بەردەوامەکان
ڕاپۆرتەکان گەیشتوونەتە ئەو ئەنجامەی کە ژمارەی ئەو کەسانەی بەردەوامن لە وەرگرتنی بیمەی بێکاری بە بڕی ١٢ هەزار کەس زیادی کردووە و کۆی گشتی گەیشتووەتە ١.٨٢١ ملیۆن کەس، ئەمەش وەک نیشاندەرێک بۆ خاوبوونەوەی خێرایی دامەزراندنی نوێ دادەنرێت
