بەغدا – INA
ئەمڕۆ دووشەممە ، جێگری یەکەمی سەرۆکی ئەنجومەنی نوێنەران، عەدنان فەیحان دلێمی، جەختی کردەوە کە دەسەڵاتی یاسادانان بایەخێکی گەورە بە چارەسەرکردنی ئەو تەحەدییانە دەدات کە ڕووبەڕووی توێژی جوتیاران دەبنەوە.
نووسینگەی ڕاگەیاندنی جێگری یەکەمی سەرۆکی ئەنجومەنی نوێنەران لە ڕاگەیەندراوێکدا، کە دەست ئاژانسی هەواڵی عێراقی (INA) کەوتووە، ئاماژەی بەوەکرد کە "جێگری یەکەمی سەرۆکی ئەنجومەنی نوێنەران، عەدنان فەیحان دلێمی، سەرۆکایەتی کۆبوونەوەیەکی فراوانی لیژنەی کشتوکاڵ و سەرچاوە ئاوییەکان و ژینگەی پەرلەمانی کرد، بە بەشداری سەرۆک و ئەندامانی لیژنەکە، و بە ئامادەبوونی سەرۆک و ئەندامانی یەکێتیی کۆمەڵە کشتوکاڵییەکان و ژمارەیەک لە پارێزگارەکان؛ بۆ تاوتوێکردنی کێشە و ئاستەنگەکانی بەردەم توێژی جوتیاران و هەوڵدان بۆ ڕەواندنەوەیان بە هەماهەنگی لەگەڵ لایەنە پەیوەندیدارەکان".
فەیحان لە میانی کۆبوونەوەکەدا جەختی کردەوە کە "ئەو تەحەدییانەی ڕووبەڕووی کەرتی کشتوکاڵ دەبنەوە، وەک نیشاندەرێکی سەرەکی لە هەڵسەنگاندنی کارنامەی وەزاری حکومەتی داهاتوو هەژمار دەکرێن، هەروەها بەدیهێنانی ئاسایشی خۆراک و پاراستنی بەرهەمی نیشتمانی لە کارە لەپێشینەکانی کاری یاسادانانن"، جەختیشی کردەوە لەسەر "پێویستی هەموارکردنەوەی یاسای یەکێتییەکە وەک ئەڵقەی پەیوەندی نێوان جوتیاران و لایەنە پەیوەندیدارەکان، و بەشداریکردن لە پێداچوونەوە بە سیاسەتەکانی ڕێکخستنی هاوردەکردن و خێراکردنی خەرجکردنی شایستە داراییەکانی جوتیاران بە شێوەیەکی دادپەروەرانە".
ئاماژەی بەوەشکرد کە "توێژی جوتیاران ڕێژەی هەرە زۆری پێکهاتەکانی کۆمەڵگە پێکدەهێنن"، دووپاتیشی کردەوە کە "دەسەڵاتی یاسادانان بایەخێکی گەورە بە چارەسەرکردنی ئەو تەحەدییانە دەدات کە ڕووبەڕوویان دەبێتەوە، و پێداگیرە لەسەر دەرکردنی بڕیاری جێبەجێکراو بە هەماهەنگی لەگەڵ حکومەت و لایەنە پەیوەندیدارەکان بۆ دانانی میکانیزمێک بۆ دیاریکردنی نرخەکان، و چارەسەرکردنی بابەتی حیجزی ئەلیکترۆنی، و جێگیرکردنی شایستە داراییەکان، جگە لە گرتنەبەری سیاسەتی کردەیی بۆ چارەسەرکردنی دۆسیەکانی پشکی ئاو، بەجۆرێک ڕێگری بکات لە دووبارەبوونەوەی قەیرانەکان و بەشدار بێت لە پەرەپێدانی کەرتی کشتوکاڵ".
