بەغداد - INA
ئەمڕۆ هەینی، یارییەکانی گەڕی ٢٩ی خولی ئەستێرەکانی عێراق بۆ تۆپی پێ بە ئەنجامدانی چوار ڕووبەڕووبوونەوەی چاوەڕوانکراو دەست پێ دەکەن، کە بەسەر یاریگاکانی بەغدای پایتەخت و پارێزگاکاندا دابەش بوون، ئەمەش لە کاتێکدایە ململانێکان بۆ بەهێزکردنی پێگەی یانەکان لە ڕیزبەندییەکەدا لەگەڵ نزیکبوونەوەی کۆتایی خولەکە گەرمتر بوون.
یارییەکان لە کاتژمێر پێنجی ئێوارە دەست پێ دەکەن، یاریگای یانەی زەورا میوانداری ڕووبەڕووبوونەوەی نێوان کارەبا و نەوتی میسان دەکات. لە هەمان کاتدا، هەردوو یانەی مووسڵ و ئەمانەی بەغدا لەسەر یاریگای فەیحا لە پارێزگای بەسرە رووبەڕوودەبنەوە، هەردوو لایەن هەوڵی ڕاستکردنەوەی ڕێڕەوی خۆیان و بەدەستهێنانی سێ خاڵی یارییەکە دەدەن.
لە کاتژمێر حەوت و نیوی ئێوارەدا، سەرنجەکان دەچنە سەر یاریگای جۆلان؛ کە تێیدا یانەی شورتەی هەڵگری نازناوەکە دەبێتە میوانێکی قورس بۆ یانەی کەرەمە بە مەبەستی پاراستنی پلەی دووەمی ڕیزبەندی. هاوکات لەگەڵ ئەم یارییەدا، یانەی نەجەف لەسەر یاریگا و لەبەردەم هاندەرانی خۆیدا میوانداری یانەی نەورۆز دەکات، لە دیدارێکدا کە چاوەڕوان دەکرێت ڕکابەرییەکی بەهێز بەخۆیەوە ببینێت.
لەلایەکی دیکەوە، لیژنەی پێشبڕکێکان بڕیاریدا یاری نێوان مینا و زاخۆ بۆ کاتێکی نادیار دوابخات؛ ئەمەش بەهۆی پابەندبوونی یانەی زاخۆ بە بەشداریکردن لە یارییەکانی خولی یانە پاڵەوانەکانی کەنداو.
