بەغدا - INA
وەزارەتی کشتوکاڵ، ئەمڕۆ پێنجشەممە، هۆکارەکانی بەرزبوونەوەی لەناکاوی نرخی تەماتەی ڕوون کردەوە.
وەزارەتەکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: مەهدی سەهەر ئەلجبووری، بریکاری کارگێڕیی وەزارەتی کشتوکاڵ، سەرۆکایەتی کۆبوونەوەی شانەی قەیرانی کرد لە ژێر ڕۆشنایی پەرەسەندنە خێراکانی ناوچەکە و لێکەوتەکانیان لەسەر کەرتی کشتوکاڵ، ئەمەش بە مەبەستی تاوتوێکردنی ئاستی ئامادەیی وەزارەت و پلانەکانی بۆ دەستەبەرکردنی بەردەوامیی بەرهەمهێنانی کشتوکاڵی لە سەرانسەری عێراقدا، بە ئامادەبوونی میساق عەبدولحسێن، بریکاری تەکنیکی وەزارەت و ئەندامانی شانەکە لە بەڕێوەبەرە گشتییەکان و پسپۆڕان.
ئاماژەی بەوەش کرد، لە کۆبوونەوەکەدا گفتوگۆ دەربارەی پلانی وردی وەزارەت کرا کە لای خۆیەوە بەردەوامیی بەرهەمهێنانی ناوخۆیی لە سەرجەم پارێزگاکان دەستەبەر دەکات لە ڕێگەی زیادکردنی بەرهەمی ناوخۆ بۆ پڕکردنەوەی پێداویستییەکان بەدرێژایی ساڵ.
ڕوونیشیکردەوە، کۆبوونەوەکە باسی لە ڕێگەکانی دابینکردنی ئالیک بۆ کەرتی سامانی ئاژەڵ و پەلەوەر کرد، لەگەڵ جەختکردنەوە لەسەر کۆنترۆڵکردنی تێچووەکانیان بۆ دەستەبەرکردنی جێگیریی نرخی مریشک و هێلکەی خواردن لە بازاڕە ناوخۆییەکاندا.
بەگوێرەی ڕاگەیەندراوەکە، ئەلجبووری ئاماژەی بەوە کرد کە بەرزبوونەوەی نرخی تەماتە لە ئەنجامی کۆتاییهاتنی وەرزی بەرهەمهێنانی ناوخۆیی و کەمییەکەی بووە بەهۆی کەمبوونەوەی هاوردەکردن لە دەرەوە، لەگەڵ قۆرخکاریی هەندێک لە هاوردەکاران لە عەلوەکاندا
