بەغداد – INA – عەبدولڕەحمان حەمید
عەقیل مفتەن، سەرۆکی لیژنەی ئۆڵۆمپیی نیشتمانیی ، ئەمڕۆ سێشەممە داوای لە ئەندامانی دەستەی گشتیی کاندیدانی یەکێتیی تۆپی پێ کرد ئەو کەسانە هەڵبژێرن کە خاوەنی دیدگایەکن بۆ پەرەپێدانی یارییەکە. هاوکات هۆشدارییدا لەوەی هەر کەسێک بێڕێزی بەرامبەر یەکێتییەکان، تیپەکان یان وەرزشوانان بکات، ڕووبەڕووی دادگای دەکەنەوە، و پێشبینیشی کرد کە هەڵبژاردەی نیشتمانی لە کۆتایییەکانی مۆندیالدا ببێتە "ئەسپە ڕەشەکە".
مفتەن لە لێدوانێکدا بۆ ئاژانسی هەواڵی عێراقی (INA) ڕایگەیاند: "لیژنەی ئۆڵۆمپی بە ماڵی هەموو وەرزشوانان و پاڵەوانان دەمێنێتەوە، تەنانەت ئەوانەشی کێشەیان لەنێواندایە"، ئاماژەی بەوەش کرد کە "هیچ نەیارێک لە ناوەندی وەرزشیدا بوونی نییە و ئێمە ئامادەین دەستوەردان بکەین بۆ چارەسەرکردنی هەر گرفتێک و لەیەک نزیککردنەوەی دیدگای هەموو لایەک".
هەروەها وتیشی: "هەوڵ دەدەین ئەو تابلۆی خۆشەویستییەی ئەمڕۆ دەیبینین، بۆ هەموو یارییەکان، یەکێتییەکان، یانەکان و هەڵبژاردەکان بگشتێنین"، جەختیشی کردەوە کە "لە مەودایەکی یەکسان لەگەڵ هەمووان وەستاوە و هەموو خۆشەویستی و ڕێزێکی بۆ سەرجەم وەرزشوانان هەیە".
سەبارەت بە هەڵبژاردنەکانی یەکێتیی تۆپی پێ، مفتەن دووپاتی کردەوە کە "هەموو کاندیدەکان برای ئێمەن و کەس ناتوانێت کاریگەری لەسەر ئیرادەی ئەندامانی دەستەی گشتی دروست بکات"، داواشی لێکردن "کەسێک هەڵبژێرن کە توانای پەرەپێدانی واقیعی تۆپی پێی عێراقی هەبێت".
سەرۆکی لیژنەی ئۆڵۆمپی ڕوو لە ڕاگەیاندنکاران وتی: "ئێوە هەوڵێکی گەورە لە ڕووماڵکردنی پاڵەوانێتییەکاندا دەدەن، بۆیە هیوادارین ئەو بابەتانە بەکارنەهێنن کە دەبنە هۆی دروستکردنی کەلێن و کێشە لە نێوان کەسەکان و یەکێتییەکەدا"، وەک نموونەش ئاماژەی بەو کەشە ئەرێنی و برایانەیە کرد کە عەدنان درجال، سەرۆکی یەکێتیی تۆپی پێ و ئەندامانی مەکتەبی جێبەجێکار کۆدەکاتەوە.
لە درێژەی قسەکانیدا وتی: "خەڵات و ئیمتیازاتی تایبەت بۆ ڕۆژنامەنووسان و بەرنامە وەرزشییە نایابەکان تەرخان دەکرێت، بەڵام لە حاڵەتەکانی بێڕێزیی ئەنقەست بەرامبەر هەر یەکێتییەک، تیپێک یان وەرزشوانێک، ئەوا دەرگای دادگا دەبێتە یەکلاکەرەوە بۆ لێپرسینەوە لە سەرپێچیکاران بەپێی ئەو مافە یاساییانەی پێمان دراوە".
سەبارەت بە بەشداریکردنی هەڵبژاردەی نیشتمانی لە مۆندیال، مفتەن جەختی کردەوە کە "بەدیهێنانی سەرکەوتن (گەییشتن بە مۆندیال) گرنگترین ئامانجە، ئێستاش گەنجەکانمان بەوپەڕی ئارامییەوە و دوور لە گوشاری دەروونی یاری دەکەن"، ئاماژەی بەوەش کرد کە "هەڵبژاردەکە دەبێتە (ئەسپە ڕەشەکە) لە پاڵەوانێتییەکەدا، بەتایبەت کە یاریزانەکانمان وەک (شێر) لێهاتوویی خۆیان بە سەرکەوتن بەسەر هەڵبژاردەیەکی جیهانی وەک پۆلیڤیادا سەلماند".
