بەغدا - INA
محەمەد شیاع سودانی، سەرۆک وەزیران، لە کاتی پێشوازیکردنی لە بەدر عەبدولعاتی، وەزیری دەرەوەی میسر، جەختی لە گرنگیی چەسپاندنی ئاگربەست و گرتنەوەی لوبنان بە ڕاگرتنی شەڕ کردەوە.
نووسینگەی ڕاگەیاندنی سەرۆک وەزیران لە ڕاگەیەندراوێکدا کە بۆ ئاژانسی هەواڵی عێراقی (INA) ی ناردووە، ڕایگەیاندووە: محەمەد شیاع سودانی، سەرۆک وەزیران، پێشوازی لە بەدر عەبدولعاتی، وەزیری دەرەوەی کۆماری میسری عەرەبی کرد؛ لە دیدارەکەدا باس لە پەرەسەندنە خێراکانی ناوچەکە کرا و جەخت کرایەوە لەسەر پێویستیی یەکخستنی هەوڵە ناوچەیی و نێودەوڵەتییەکان بە ئامانجی ڕاگرتنی گرژییەکان و کۆنترۆڵکردنی شوێنەوارەکانی جەنگ.
بەپێی ڕاگەیەندراوەکە، سەرۆک وەزیران جەختی لە گرنگیی چەسپاندنی ئاگربەست و گرتنەوەی لوبنان بە ڕاگرتنی شەڕ کردەوە، هەروەها جارێکی دیکە سەرکۆنەی دەستدرێژییەکانی داگیرکەری زایۆنیستی بۆ سەر گەلی لوبنانی برای کردەوە.
سەرۆک وەزیران ئاماژەی بە پێویستیی بەردەوامبوونی هەماهەنگی و هاوکاریی هاوبەشی عەرەبی کرد بۆ کارکردن لەسەر کۆنترۆڵکردنی گرژییەکان و دوورکەوتنەوە لە نائارامیی زیاتر، هەروەها جەختی لە پشتگیریی بەردەوامی عێراق بۆ چالاککردنی گفتوگۆ و چارەسەرە دیپلۆماسییەکان کردەوە بە مەبەستی بەهێزکردنی هێورکردنەوە و پاراستنی سەروەریی وڵاتانی ناوچەکە و تواناکانی گەلەکانیان.
لای خۆشییەوە، وەزیری دەرەوەی میسر پشتیوانیی وڵاتەکەی بۆ دیدگای حکومەتی عێراق و هەوڵەکانی بۆ دوورخستنەوەی وڵاتانی ناوچەکە لە لێکەوتەکانی زیاتری جەنگ دووپات کردەوە، ئاماژەی بە گرنگیی بەردەوامبوونی هەوڵە هاوبەشەکانی نێوان هەموو لایەنە ناوچەیی و نێودەوڵەتییەکان کرد بۆ بەهێزکردنی ئاسایش و سەقامگیری لە ناوچەکەدا
