شەفەق نیوز- بەغدا
ئەنجومەن باڵای دادوەری لە عراق، ئمڕوو چوارشەممە، ئامار گرێبەستەیل هاوسەرگیری و حاڵەتەیل تەڵاق توومارکریاگ لە ماوەی مانگ تشرین دویەم 2025 رگەیان، وەپای ئامارەگە 26 هەزار و 129 گرێبەست هاوسەرگیری لە وەرانوەر 5 هەزار و 805 حاڵەت تەڵاق لە سەرتاسەر وڵات توومارکریانە.
وەپای ئەو ئامارە لە سەرۆکایەتیی دادگایەیل تێهەڵچگن دەرچگە و دەس ئاژانس شەفەق نیوز کەفتیە، دادگای تێهەڵچگن بەغدا/ رەسافە لە رز یەکەم شماەر گرێبەستەیل هاوسەرگیرین وە 3961 گرێبەست، لە دویای ئەویش بەغدا/ کەرخ وە 3132 گرێبەست و لەدویایش نەینەوا وە 2819 گرێبەست تێن.
حاڵەتەیل تەڵاق، دادگای بەغدا/ رەسافە بەرزترین رێژەی توومارکردیە کە 1239 حاڵەت بویە، لە دویای ئەویش بەغدا/ کەرخ وە 920 حاڵەت و بەسڕە وە 637 حاڵەت تێن.