دیجیتال میدیای سپێده
پۆلیسی ئەڵمانیا هەڵیکوتایە سەر نووسینگەی فرانکفۆرتی رۆژنامەی سەباح کە ناوەندی هەواڵەکانی ئەورووپای رۆژنامەکەیە و دوو رۆژنامەوانی دەستگیر کرد.
بەپێی ئەو زانیارییانەی لە سەرچاوەکانی رۆژنامەی سەباح-ەوە بەدەست گەیشتوون پۆلیسی ئەڵمانیا هەڵیکوتاوەتە سەر ماڵی ئیسماعیل ئەرەل و جەمیل ئاڵبای و نووسینگەی ئەورووپای رۆژنامەی سەباح و دەستیان بەسەر کۆمپیوتەر و تەلەفۆنەکاندا گرتووە.
هێشتا زانیاریی تەواو نەدراوە کە داخۆ بە چ مەبەستێک هەڵکوتانەسەرەکە ئەنجام دراوە.
زاندراوە بەمەبەستی ئازادکردنی دوو رۆژنامەوانەکە، وەزارەتی دەرەوەی تورکیا و رێکخراوە پیشەیییەکان هاتوونەتە سەر هێڵ.
بەپێی زانیاریی سەرچاوە دیپلۆماتییەکان دەستگیرکردنی ئەم دوو رۆژنامەوانە پێشێلکردنی ئازادیی کاری میدیایییە و ئەمەیش بە لایەنە پەیوەندیدارەکانی ئەڵمانیا گەیەندراوە.
سەرچاوەکان ئاماژە بەوە دەدەن کە ئەم رووداوە لە ئەنقەرە و لە بەرلین سەرکۆنە کراوە، تیشک خراوەتە سەر ئەوەی کە بەم جۆرە مامەڵەکردن لەگەڵ رۆژنامەواناندا قبوڵکراو نییە و بەمەبەستی ئازادکردنی رۆژنامەوانەکانیش لەسەر ئاستی بەرزدا گفتوگۆ لەگەڵ لایەنە پەیوەندیدارەکانی ئەڵمانیا بەردەوامە.