بەدواداچوون - INA
هێشتا دەنگۆ و هەواڵەکان ئەستێرەی میسری محەممەد سەلاح بە چوونە ڕیزەکانی یانەی بێشیکتاشی تورکییەوە دەبەستنەوە، دوای دەرکەوتنی ناوێکی نوێ لە نێوان سپۆنسەرەکانی ڕێککەوتنەکەدا.
ڕاگەیاندکاری تورکی لێڤەنت ئومێت ئیرۆڵ، ئەوەی لە ڕاپۆرتەکانی پێشوودا ڕاگەیەنرا بوو دووپاتی کردەوە و ڕوونی کردەوە کە محەممەد سەلاح ڕوو لە یانەی بێشیکتاش دەکات، و درێسی ژمارە 11 دەپۆشێت کە هەمیشە لە لیڤەرپوول بەو ژمارەیەوە ناسرابوو.
ئیرۆڵ ئاماژەی بەوەشکرد کە کۆمپانیای "هێڵە ئاسمانییەکانی تورکیا" هاتووەتە نێو سپۆنسەرەکانی ڕێککەوتنەکەوە، و گوتی کە چەندین بڕگەی ریکلامی و ڕێکخستنی تایبەت بەم بۆنەیەوە وێنە دەگیرێن، کە تێیاندا هێما و دروشمەکانی "داڵ"ی تایبەت بە یانەی بێشیکتاش دەردەکەون.
ئەو ڕاگەیاندکارە پەیامێکی ئاڕاستەی هاندەرانی یانەکە کرد و گوتی: "با هاندەرانی بێشیکتاش دڵنیا بن، چاویان بە سەلاح دەکەوێتەوە".
ئەم پەیوەستکردنەی محەممەد سەلاح بە یانەی بێشیکتاشەوە بابەتێکی نوێ نییە، چونکە ڕاپۆرتەکانی پێشوو ئاماژەیان بەوە کردبوو کە یانە تورکییەکە گەیشتووەتە ڕێککەوتنی بەرایی بۆ گواستنەوەی ئەستێرەکەی "فیرعەونەکان".
لە سێبەری دانوستانەکان بۆ گرێبەستکردن لەگەڵ "پاشای میسری"، سەردار ئادالی سەرۆکی یانەی بێشیکتاش هێرشی کردە سەر ڕامی عەباس بریکاری کارەکانی سەلاح، بەهۆی بەرزکردنەوەی بڕی کۆمسیۆنەکەی بۆ 35%، پێش ئەوەی لەو ڕێژەیە پاشگەز ببێتەوە، ئەمەش پرۆسەی تەواوکردنی ڕێککەوتنەکە ئاسانتر دەکات.
لەم چوارچێوەیەدا، کارگێڕیی یانەکە ڕێنماییداوە بە بەشی ڕاگەیاندن و ڕێکخستن بۆ ئامادەکردنی سەکۆکانی پەخش و تۆڕە کۆمەڵایەتییەکان بە مەبەستی ڕاگەیاندنی فەرمیی ڕێککەوتنەکە لە کاتێکی گونجاودا.