فەرمانگەی تەندروستیی نەجەفی ئەشرەف تواناکانی بۆ زیارەتی چڵە دەخاتە گەڕ

نەجەفی ئەشرەف - INA - حەیدەر فەرمان

فەرمانگەی تەندروستیی پارێزگای نەجەفی ئەشرەف، ئەمڕۆ شەممە، تەواوبوونی ئامادەکارییەکانی بۆ جێبەجێکردنی پلانی تەندروستیی تایبەت بە زیارەتی چڵەی ئیمام حوسێن (سڵاوی خوای لێ بێت) ڕاگەیاند.

ماهر یاسر عەبودی، بەڕێوەبەری ڕاگەیاندنی فەرمانگەی تەندروستیی نەجەفی ئەشرەف، بە ئاژانسی هەواڵی عێراقی (INA)ی ڕاگەیاند: "فەرمانگەی تەندروستیی نەجەف، بە ڕاسپاردەی وەزیری تەندروستی عەبدولحوسێن ئەلموسەوی، و بە سەرپەرشتیی ڕاستەوخۆی بەڕێوەبەری گشتیی فەرمانگەکە زەینولعابیدین ئەلئەسەدی، سەرجەم ئامادەکارییەکانی تایبەت بە پلانی تەندروستیی زیارەتی چڵەی تەواو کردووە."

هه‌روه‌ها ئه‌وه‌یش وت "پلانەکە بەسەر چوار تەوەری سەرەکیدا دابەش کراوە؛ تەوەری یەکەم تەوەری نەجەف–حەیدەرییە–کەربەلایە، کە لە پردەکانی شۆڕشی بیستەوە تا سنوری کارگێڕیی پارێزگای کەربەلای پیرۆز درێژ دەبێتەوە و ٢٣ مەفرەزەی پزیشکی و ٢٦ ئۆتۆمبێلی فریاکەوتن (ئەمبوڵانس) لەخۆدەگرێت."

ڕوونیشی کردەوە کە "تەوەری دووەم، نەجەف–کوفە–عەباسییە–بابل، لە پردەکانی شۆڕشی بیستەوە دەست پێدەکات تا سنوری کارگێڕیی پارێزگای بابل، و ٢١ مەفرەزەی پزیشکی و ١٦ ئۆتۆمبێلی فریاکەوتن لەخۆدەگرێت، لە کاتێکدا تەوەری سێیەم، نەجەف–مەنازیرە–مشخاب–قادسییە، لە پردەکانی شۆڕشی بیستەوە درێژ دەبێتەوە تا ناحیەی قادسییە، و ١٨ مەفرەزەی پزیشکی و ١٦ ئۆتۆمبێلی فریاکەوتن لەخۆدەگرێت."

عەبودی ئه‌وه‌یش وت: "تەوەری چوارەم شارۆچکەی کۆن و سەنتەری شاری نەجەف دەگرێتەوە، لە مەرقەدی ئیمام عەلی (سڵاوی خوای لێ بێت) تا پردەکانی شۆڕشی بیست درێژ دەبێتەوە و چوار مەفرەزەی پزیشکی لەخۆدەگرێت."

ئاماژەی بەوەش کرد کە "پلانی تەندروستی زیاتر لە ٩٥ مەفرەزەی پزیشکی دەگرێتەوە، و زیاتر لە چوار هەزار کارمەند لە ناونیشان و پسپۆڕییە جیاوازەکان بەشدارن لە جێبەجێکردنیدا، لە کاتێکدا زیاتر لە ١٠٠ ئۆتۆمبێلی فریاکەوتن ئامادەییان هەیە، سەرەڕای ئۆتۆمبێلەکانی ئاستانەی پیرۆزی عەلەوی و حەشدی شەعبی، لەگەڵ ئەو پشتیوانییەی لەلایەن وەزارەتی تەندروستییەوە پێشکەش دەکرێت."

عەبودی جەختی کردەوە کە "سەرجەم نەخۆشخانەکانی پارێزگاکە لەناو پلانی تەندروستیدان، لە کاتێکدا تیمەکانی تەندروستیی گشتی بەدواداچوون بۆ ئەو خۆراکانە دەکەن کە لە موکیبە حسێنییەکاندا پێشکەش دەکرێن بۆ دڵنیابوونەوە لە شیاوییان، هاوشانی بەردەوامیی پێشکەشکردنی ڕێنمایی و هۆشیاریی تەندروستی لە سەرانسەری ماوەی زیارەتەکەدا."

ئەوەشی خستە ڕوو کە "مەفرەزە پزیشکییەکانی سەر بە فەرمانگەی تەندروستیی نەجەف درێژ دەبنەوە بۆ ناو پارێزگای کەربەلای پیرۆزیش، و سەرجەم ڕێگاکانی بەرەو کەربەلا لە ڕووی تەندروستییەوە لە ڕێگەی نەخۆشخانە و مەفرەزە پزیشکییەکانەوە دابین کراون"، ڕوونیشی کردەوە کە "پلانەکە ناوچەکانی قەزا و ناحییەکانیش دەگرێتەوە، لەوانە مەنازیرە، مشخاب و کوفە، سەرەڕای ناوچە جیاوازەکانی تر کە دەکەونە ناو پلانی تەندروستیی ناوخۆیی پارێزگاکەوە."