بەغداد – INA – محەمەد تاڵبی
بەڕێوەبەرایەتیی هاتووچۆی گشتی، ئەمڕۆ پێنجشەممە، گرنگترین ئەو پێشنیارانەی ئاشکرا کرد کە بۆ هەموارکردنەوەی یاسای هاتووچۆ پێشکەش کراون؛ ئاماژەی بەوەش کرد کە یەکێک لە پێشنیارەکان بریتییە لە ڕێگەدان بە تاریککردنی جامی ئۆتۆمبێلەکان بە ڕێژەی ٣٠٪.
هاوکات بەڕێوەبەرایەتیی هاتووچۆ جەختی لەوە کردەوە کە بەپێی نوێترین ئاماژەکانی ڕێکخراوی تەندروستیی جیهانی (WHO)، عێراق کەمترین ڕێژەی ڕووداوەکانی هاتووچۆی لەسەر ئاستی ناوچەکەدا تۆمار کردووە..
فەریق عودەی سەمیر حەسانی، بەڕێوەبەری گشتیی هاتووچۆ، بە ئاژانسی هەواڵی عێراقی (INA)ی ڕاگەیاند: "پڕۆژەیاسای هەموارکراوی هاتووچۆمان لەگەڵ لیژنەی ئاسایش و بەرگریی پەرلەمان تاوتوێ کردووە، کە چەندین پێشنیاز لەخۆدەگرێت بە ئامانجی کەمکردنەوەی بارگرانی لەسەر شانی هاووڵاتییان."
حەسانی دەربارەی گۆڕانکارییەکان ڕوونیکردەوە: "سەبارەت بە مۆڵەتی شۆفێری، مەرجی تەمەن وەک خۆی (١٨ ساڵ) دەمێنێتەوە، بەڵام سیستەمی تاقیکردنەوەکان پەرەی پێ دراوە تاوەکو وردتر و تۆکمەتر بێت."
سەبارەت بە غەرامەکان، ئاماژەی بەوە کرد: "پێشنیاز کراوە بڕی غەرامەکان بۆ نیوە (٥٠٪) کەم بکرێتەوە و دواتر بۆ ٢٥٪یش داببەزێنرێت، هاوکات بڕیاری دوو هێندەکردنی غەرامەکان هەڵدەوەشێتەوە. هەروەها ئەو بڕیارەمان هەڵوەشاندووەتەوە کە داشکاندنی بۆ ئەو کەسانە دەکرد کە لە ماوەی ٣ ڕۆژدا غەرامەکانیان دەدا."
بەڕێوەبەری هاتووچۆ جەختی کردەوە کە غەرامەی سەرپێچیی "ڕۆیشتن بە ئاراستەی پێچەوانە" بۆ ٥٠٠ هەزار دینار زیاد دەکرێت.
لە لایەکی دیکەوە، پڕۆژەیاساکە ئاستی خێراییە ڕێگەپێدراوەکانی بەم شێوەیە دیاریکردووە:
* لەسەر ڕێگا خێراکان : ١٤٠ کم/س.
* لەسەر ڕێگا دەرەکییەکان: ١٢٠ کم/س.
* لەسەر ڕێگا خێراکانی ناوەوەی شارەکان: ١٠٠ کم/س.
حەسانی ڕایگەیاند: "پێشنیارەکە ڕێگە دەدات بە تاریککردنی جامی ئۆتۆمبێل بە ڕێژەی (٢٠٪ بۆ ٣٠٪) بەبێ وەرگرتنی هیچ بڕە پارەیەک؛ بەو مەرجەی بەڕێوەبەرایەتیی هاتووچۆ خۆی سەرپەرشتی جێبەجێکردنی بکات." ئاماژەی بەوەش کرد کە ئەم جۆرە تاریککردنە بێبەرامبەرە، لۆگۆی بەڕێوەبەرایەتییەکەی پێوە دەبێت و ڕەنگەکەی مەیلی لە سپی دەبێت، بەڵام ئەو تاریککردنەی کە بەرامبەر پارە دەبێت، ڕەنگی قاوەیی دەبێت تاوەکو لە جۆرە بێبەرامبەرەکە جیابکرێتەوە.
سەبارەت بە پەیوەندییەکانی نێوان بەغداد و هەولێر، حەسانی ئاشکرای کرد: "بەڕێوەبەرایەتیی هاتووچۆی گشتی کاری کردووە بۆ یەکخستنی ڕێکارەکان لەگەڵ بەڕێوەبەرایەتیی هاتووچۆی هەرێمی کوردستان؛ بە شێوەیەک کە ئەو ڕێژەی تاریککردنەی لە ناسنامەی ئۆتۆمبێل (ساڵانە) جێگیر دەکرێت یان لە ڕێگەی نووسراوی فەرمییەوە لە لایەن ئێمەوە دەدرێت، لە هەرێمی کوردستان دانی پێدا دەنرێت و کاری پێ دەکرێت، بە هەمان شێوەش بۆ ئۆتۆمبێلەکانی هەرێم لە ناوچەکانی دیکەی عێراق هەمان ڕێکار جێبەجێ دەبێت."
لە کۆتایی قسەکانیدا، حەسانی جەختی کردەوە کە عێراق کەمترین ڕێژەی ڕووداوەکانی هاتووچۆی لە ناوچەکەدا تۆمار کردووە، کە بەپێی پێوەرەکانی ڕێکخراوی تەندروستیی جیهانی (WHO) ڕێژەکە گەیشتووەتە (٢.٢٪)، ئەمەش لەسەر بنەمای بەراوردکردنی ژمارەی ڕووداوەکان بە ژمارەی دانیشتووان و ئۆتۆمبێلەکان دیاریکراوە.