هەولێر – INA– ئیڤان ناسر حەسەن
وەزارەتی پەروەردەی حکومەتی هەرێمی کوردستان، ئەمڕۆ پێنجشەممە، مەراسیمێکی بەرفراوانی بۆ ڕێزلێنان لەو قوتابخانە،و ناوەندە فێرکارییەکانە و مامۆستایانە ڕێکخست کە لەسەر ئاستی هەرێم بۆ ساڵی خوێندنی ٢٠٢٥-٢٠٢٦ پلەی یەکەمیان بەدەستهێنابوو.
پەیامنێری ئاژانسی هەواڵی عێراقی (INA) ڕایگەیاند: "مەراسیمەکە بە ئامادەبوونی ژمارەیەکی زۆر لە بەرپرسانی حکومی و پەروەردەیی بەڕێوەچوو؛ تێیدا ئالان حەمەسەعید، وەزیری پەروەردەی هەرێم، بڕوانامەی دەستخۆشی و قەڵغانی ڕێزلێنانی بەخشییە بەڕێوەبەری قوتابخانە و مامۆستا لێهاتووەکان، وەک پێزانینێک بۆ هەوڵە ناوازەکانیان لە پێشخستنی پڕۆسەی پەروەردە و جێبەجێکردنی پێوەرەکانی کوالێتیی خوێندن."
ئالان حەمەسەعید لە لێدوانێکدا بۆ ئاژانسی (INA) جەختی کردەوە کە: "پڕۆسەی هەڵسەنگاندن و ڕێزلێنان تەنیا ڕێکارێکی کارگێڕی نییە، بەڵکو هاندەرێکی ڕاستەقینەیە بۆ بەرزکردنەوەی ئاستی مامۆستایان." وتیشی: "هیچ سیستەمێکی پەروەردەیی لە جیهاندا لە تواناکانی مامۆستا لەناو پۆلدا بەهێزتر و گرنگتر نییە."
وەزیری پەروەردە ئاماژەی بەوەش کرد کە پڕۆسەی فێرکاری لە هەرێم بەپێی میکانیزم و پێوەرە زانستییەکانی لیژنەیەکی پسپۆڕ لە وەزارەت بەڕێوەدەچێت. ڕوونیشیکردەوە کە لە ساڵی خوێندنی ڕابردوودا ٩٦ قوتابخانە دەستنیشان کرابوون و پڕۆژەکەیان تێدا جێبەجێ کراوە، هاوکات پلانێکیش هەیە بۆ فراوانکردنی پڕۆژەکە لە ساڵی داهاتوودا لە چوارچێوەی سیستەمی پەروەردەیی هەرێمی کوردستاندا.