بەغدا – INA
ئەمڕۆ دووشەممە، دەستەی دەروازە سنوورییەکان، پووچەڵکردنەوەی هەوڵێکی قاچاخچێتیی دەرمانی مرۆیی لە دەروازەی بەندەری ئوم قەسری باکوور ڕاگەیاند.
وتەبێژی دەستەکە، عەلائەدین قەیسی، لە ڕاگەیەندراوێکدا کە دەستی ئاژانسی هەواڵی عێراقی (INA) کەوتووە، ئاماژەی بەوەشکردووە: "بەڕێوەبەرایەتیی دەروازەی بەندەری ئوم قەسری باکووری سەر بە دەستەکە، بە هاوکاری لەگەڵ فەرمانگە کارپێکەر و پاڵپشتیکارەکان، و دوای وەرگرتنی ڕەزامەندیی دادوەری لێکۆڵینەوە، توانیویانە دەست بەسەر سێ کۆنتێنەری قەبارە (40) پێدا بگرن کە (دەرمانی مرۆیی پزیشکیی جۆراوجۆر)یان تێدابووە و لە پشتی ئەو کەلوپەلانەوە شاردرابوونەوە کە ڕاگەیەندراون و بۆ قاچاخچێتی ئامادەکرابوون"، ڕوونییشی کردەوە کە "ئەم دەرمانانە هیچ ڕەزامەندییەکی هاوردەکردنیان لە وەزارەتی تەندروستییەوە نەبووە و هیچ بەڵگەیەکیش نییە کە گونجانیان لەگەڵ تایبەتمەندییە پێوانەیییەکانی عێراق یان شیاوییان بۆ بەکارهێنانی پزیشکی بسەلمێنێت، لەپاڵ ئەوەی لە ناو کۆنتێنەری ساردنەکراوەدا بوون".
ئەوەشی خستە ڕوو کە "کۆنووسی دەستبەسەرداگرتن و پشکنینی بنەڕەتی ڕێکخراوە و کەلوپەلە دەستبەسەرداگیراوەکان ڕەوانەی بنکەی پۆلیسی گومرگی ئوم قەسری باکوور کراون بە مەبەستی گرتنەبەری ڕێکارە یاسایییە گونجاوەکان".