بەغدا - INA - ویسام مەلا
ئەمڕۆ دووشەممە، لێژنەی کارەبا و وزەی پەرلەمان، ڕایگەیاند کە ڕێککەوتننامەکانی وزە لەگەڵ ویلایەتە یەکگرتووەکانی ئەمریکا، دۆخی وزە لە عێراق باشتر دەکەن، هاوكات ئاماژەی بەوەشکرد کە کاریگەرییە ئەرێنییەکانی لە ساڵانی داهاتوودا دەردەکەون.
سەرۆکی لێژنەی کارەبا و وزەی پەرلەمان، فەلاح دلێمی، لە لێدوانێکدا بۆ ئاژانسی هەواڵی عێراقی (INA) ڕایگەیاند: "ئەو ڕێککەوتننامانەی وزە کە لەگەڵ ویلایەتە یەکگرتووەکانی ئەمریکا واژۆ کراون، دۆخی کارەبا لە عێراق باشتر دەکەن".
ڕوونییشی کردەوە کە "قەیرانی کارەبا لە ماوەی هاوینی ئەمساڵدا بەردەوام دەبێت بەهۆی پچڕانی غاز و هاوردەنەکردنی وزەی کارەبا"، ئاماژەی بەوەشکرد کە "لە ساڵانی داهاتوودا کاریگەرییە ئەرێنییەکانی ئەو ڕێککەوتننامانەی کە لەگەڵ لایەنی ئەمریکی واژۆ کراون، بەدی دەکەین".
تێبینیی ئەوەشی خستە ڕوو کە "لێژنەی کارەبا و وزە، ڕۆژی پێنجشەممەی داهاتوو میوانداریی وەزیری کارەبا دەکات بە مەبەستی تاوتوێکردنی قەیرانی کارەبا و ئەو چارەسەرانەی کە خراونەتەڕوو، لەپاڵ پرسی شاری وزە لە فاو و چەندین بابەتی دیکە".