بەغدا – INA
ئەمڕۆ دووشەممە، دەستەی دەسپاکیى فیدراڵی، دەستگیرکردنی بەرپرسێکی لە بەشی ژمێریاریی دیوانی پارێزگای دیالە ڕاگەیاند؛ کە بەهۆی هەڵە گەورەکەیەوە بووەتە هۆی گەیاندنی زیان بە سامان و بەرژەوەندییەکانی ئەو لایەنەی کاری تێدا دەکات.
ڕاگەیەندراوێکی دەستەکە کە دەستی ئاژانسی هەواڵی عێراقی (INA) کەوتووە، ئاماژەی بەوەشکردووە: "ئەو تیمەی لە نووسینگەی لێکۆڵینەوەی دیالە پێکهێنرابوو، دەستبەسەر بەرپرسی هۆبەیەکدا لە دیوانی پارێزگادا گرتووە؛ ئەمەش بەهۆی ئەوەی نامەی دەستەبەری تایبەت بە پڕۆژەی چاککردنەوە و قیرتاوکردنی شەقامەکانی شاری بەعقوبەی ڕادەستی بەڕێوەبەری ڕێپێدراوی کۆمپانیا جێبەجێکارەکە کردووە، سەرەڕای ئەوەی پڕۆژەکە وەرنەگیراوە و سەرپێچیی تێدا بووە، و تۆمەتبارەکە بانگەشەی ئەوەی کردووە کە بەهۆی گومانی نەمانی پێویستی بەو نامەیە و تێکەڵبوونی زانیاری لای کە پڕۆژەکە بە کۆتایی وەرگیراوە، ئەو کارەی کردووە".
ڕوونییشی کردەوە کە "تیمەکەیان چوونەتە شوێنی پڕۆژەکە و تێبینی هەبوونی درز، نیشتن و زیانی گەورەیان لە یەکێک لە شەقامە جێبەجێکراوەکاندا کردووە؛ سەرەڕای تێپەڕبوونی تەنها چەند مانگێکی کەم بەسەر قیرتاوکردنیدا لە چوارچێوەی ئەو کارانەی سپێردرابوون بە کۆمپانیایەکی ناوخۆیی بە گوژمەی 1,261,600,000 (یەک ملیار و دووسەد و شەست و یەک ملیۆن و شەشسەد هەزار) دینار".
ئاماژەی بەوەشکرد کە "پڕۆژەکە بە شێوەی کۆتایی وەرنەگیراوە؛ بەهۆی هەبوونی زیانی چارەسەرنەکراو تێیدا"، سەرنجی بۆ ئەوەش ڕاکێشا کە لیژنەیەکی چاککردنەوە پێکهێنراوە و خەمڵاندنێکی بۆ ئەو زیانانە ئامادە کردووە کە لە کاتی جێبەجێکردنی شەقامەکەدا ڕوویانداوە، بەڵام دواتر لیژنەکە هەڵوەشێنراوەتەوە؛ بەهۆی نەبوونی هیچ سپاردەیەکی دارایی تایبەت بە کۆمپانیاکە.
ئەوەشی خستە ڕوو کە "کۆنووسێکی دەستبەسەرداگرتن ڕێکخراوە و لەگەڵ تۆمەتبارەکەدا خرایە بەردەم دادوەرانی دادگای لێکۆڵینەوەی دەسپاکی لە بەعقوبە، کە بڕیاریدا لێکۆڵینەوەی لەگەڵدا بکرێت؛ بە پشتبەستن بە بڕگەکانی ماددەی 341 لە یاسای سزاداندا".