بەغداد - INA
ئهمانهی بەغداد کاراکردنی چەند ڕێکارێکی ڕێکخستن و چاودێری ئاشکرا کرد، لەوانەش بەنیازی دەستپێکردنی پڕۆژەی جێبەجێکردنی "مۆڵەتی نیشتەجێبوون و کارکردن ساڵانە بۆ باڵەخانە و دوکانە بازرگانییەکان، ئەمەش بۆ دڵنیابوونەوە لە سەلامەتی و شیاوی تەکنیکییان و بە مەبەستی ڕێگریکردن لە ڕووداو و ئاگرکەوتنەوەکان کە بەهۆی بەکارهێنانی خراپەوە دەست پێدەکەن.
عەلی حەسەن لەفتە، بریکاری تەکنیکی ئهمانهی بەغداد، بە ئاژانسی هەواڵی عێراقی (INA)ی ڕاگەیاند: " ئهمانهی بهغدا لایەنی بەرپرسە لە ماستەرپلان و ڕێکخستنی پایتەخت و پیشەکان بەپێی یاسای ژمارە 1ی ساڵی 2023، بۆیە ناتوانرێت ڕێگە بە ئەنجامدانی چالاکی بازرگانی بە شێوەیەکی هەڕەمەکی و سەرپێچی بدرێت." ئاماژەی بەوەش کرد کە ڕێنمایی تایبەت بۆ نووسینگەکانی کڕین و فرۆشتنی خانوبەرە دەرکراوە، ئەمەش بە هەماهەنگی لەگەڵ ژووری بازرگانی بەغداد و دەزگای ئاسایشی نیشتمانی بۆ ڕێگریکردن لە قەرەباڵغبوونیان لە شەقامەکان و شێواندنی سیمای گشتی، و گشتاندنی بۆ کراوە بۆ شارەوانییەکان بۆ لێپرسینەوە لە سەرپێچیکاران.
لەفتە وتیشی: "ئەم ڕێنماییە توندانە چێشتخانەکان، چالاکییە کات بەسەربردنەکان، کوشتارگەکان و سەرتاشخانەکانیش دەگرێتەوە، ئەمەش لە ڕێگەی ڕەچاوکردنی سروشتی بەکارهێنانی زەوییەکان و ڕێگریکردن لە دروستکردنیان لە ناو گەڕەکە نیشتەجێبووەکاندا بە شێوەیەکی پێچەوانەی یاسا." هاوکات ئاماژەی بە هەندێک کێشە کرد کە ڕووبەڕووی کارەکانیان دەبێتەوە بەهۆی ئەوەی هەندێک لایەنی وزاری بەبێ گەڕانەوە بۆ ئهمانهی مۆڵەت دەدەن، وەک وەزارەتی ڕۆشنبیری و گەشتوگوزار، دەستەی گەشەپێدانی پیشەسازی لە وەزارەتی پیشەسازی، جگە لە وەزارەتی تەندروستی.
بریکاری تەکنیکی ئاماژەی بەوەش دا کە "ئاڕاستەی ئێستای حکومەت جەخت لەسەر بەدیجیتاڵکردنی تەواوی ئەم ڕێکارانە دەکاتەوە لە ڕێگەی پێگهی ئۆری ئەلیکترۆنییەوە بۆ گێڕانەوەی کات و ماندووبوون." جەختیشی کردەوە کە هەماهەنگی هاوبەش لەگەڵ وەزارەتەکانی تەندروستی و بازرگانی، ژووری بازرگانی و تۆمارکەری کۆمپانیاکان دەستیپێکردووە بۆ ئەوەی ئهمانهی بەغداد ببێتە پەنجەرەیەکی سەرەکی پێش پێدانی هەر ڕەزامەندییەک؛ چونکە ڕۆڵی ئهمانهی جەخت لەسەر پێدانی ڕەزامەندی پلاندانانی شوێنەکە دەکاتەوە، لە کاتێکدا کەرتە پسپۆڕەکانی تر ڕسووماتی دارایی تایبەت بە خۆیان دیاری دەکەن.
لەفتە باسی لەوەش کرد کە "پڕۆژەی 'مۆڵەتی نیشتەجێبوون و کارکردن'ی ساڵانە بوونی هەیە، کە بەشدار دەبێت لە چارەسەرکردنی ئەو کێشە یاساییانەی کە بەهۆی گۆڕینی چەندین کەس لەسەر یەک دوکان یان گۆڕینی پیشەی هاوڵاتیانەوە دروست دەبن، جگە لە خستنەبەر باری لێپرسینەوە و هەڵسەنگاندنی بەردەوام بۆ باڵەخانە کۆن و بەکارهاتووەکان، کە ئامانج لێی کۆتاییهێنانە بەم پشێوییە و ڕێگریکردنە لە ئاگرکەوتنەوەکان." پێشبینیشی کرد کە لە ماوەی یەک ساڵدا سیمای تەواوی جێبەجێکردنی ئەم پڕۆژە ڕێکخستن و خزمەتگوزارییە ڕوون بێتەوە، بۆ دڵنیابوون لە سەلامەتی هاوڵاتیان و پاراستنی مافەکانی دەوڵەت.