فەرماندەیی ناوەندیی ئەمەریکا (CENTCOM) ڕۆژی هەینی ڕایگەیاند کە هێزەکانی ئەمەریکا تاوەری چاودێری بەندەری شەهید کەلانتارییان لە شاری چەهبەهار بە سەرکەوتوویی تێکشکاندووە.
سێنتکۆم لە پلاتفۆرمی ئێکس ڕایگەیاند کە تاوەرەکە بەشێکە لە تۆڕی چاودێری ئێران بەدرێژایی کەناراوەکانی کەنداوی عومان.
فەرماندەی ناوەندی ئەمەریکا ئاماژەی بەوەشکردووە کە سوپای پاسدارانی ئێران دەیان ساڵە ئەو تۆڕە بۆ بەدواداچوون و بە ئامانجگرتنی ئەو کەشتییە بازرگانیانەی کە بە گەرووی هورمزدا تێدەپەڕن بەکاردەهێنێت.
هەروەها پشتڕاستی کردەوە کە وێرانکردنی تاوەرەکە ڕاستەوخۆ کاریگەری لەسەر توانای سوپای پاسداران هەیە بۆ هێرشکردنە سەر کەشتییە بێتاوانەکان.
سێنتکۆم هەروەها ڕایگەیاندووە کە ئەم هێرشە بۆ سەر ئێران ئازادی کەشتیوانی لە ئاوەکانی ناوچەکەدا دەپارێزێت، جگە لەو کەشتیانەی کە هەوڵی پێشێلکردنی گەمارۆی دەریایی ئەمەریکا بۆ سەر ئێران دەدەن.
پێشتر سێنتکۆم لە بەیاننامەیەکدا لەسەر پلاتفۆرمی ئێکس بانگەشەکانی هێزەکانی ئێرانی ڕەتکردەوە کە ئێران هێرشی کردووەتە سەر بنکەی تەنێف لە سوریا و گوایە سەربازانی ئەمەریکای کردووەتە ئامانج.
سێنتکۆم پشتڕاستی کردەوە کە ئێران هیچ سەربازێکی ئەمەریکایی نەکردووەتە ئامانج.