بەغداد – INA
لیژنەی ئەمنی و بەرگریی ئەنجومەنی نوێنەران، ئەمڕۆ پێنجشەممە، ڕووداوی هێرشکردنە سەر ڕاوچییە عێراقییەکانی لە پارێزگای بەسرە تاوتوێ کرد و جەختی لەوە کردەوە کە خوێنی هاووڵاتییان بەرپرسیارێتییەکی نیشتمانییە و ناتوانرێت چاوپۆشی یان سازشی لەسەر بکرێت.
فەرمانگەی ڕاگەیاندنی پەرلەمان لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ، ڕایگەیاند: "لەسەر داوای سەرۆکایەتیی ئەنجومەنی نوێنەران، لیژنەی ئەمنی و بەرگری بە سەرۆکایەتیی پەرلەمانتار (خالید عوبەیدی)، کۆبوونەوەیەکی فراوانی میوانداریی لە هۆڵی شەهید ئەبو مەهدی موهەندیس لە ناو باڵەخانەی پەرلەمان ئەنجام دا، بە مەبەستی گفتوگۆکردن لەسەر وردەکاریی ئەو ڕووداوە دڵتەزێنەی کە بەرەوڕووی ژمارەیەک ڕاوچیی عێراقی لە پارێزگای بەسرە بووەوە."
ڕاگەیەندراوەکە ئاماژەی بەوەش کردووە کە ڕووداوەکە بووەتە هۆی شەهیدبوونی ڕاوچی (نەجم عەبدوڵا خالید تەمیمی) خەڵکی قەزای فاو، هەروەها برینداربوون و دەستگیرکردنی چەند ڕاوچییەکی تر کە دواتر ئازاد کراون. کۆبوونەوەکە بە ئامادەبوونی ئەندامانی لیژنەکە، ژمارەیەک لە نوێنەرانی پارێزگای بەسرە لە پەرلەمان، شێخ و کەسایەتییەکان و کەسوکاری شەهیدەکە بەڕێوەچوو.".
لە ڕاگەیەندراوەکەدا هاتووە: "لیژنەی ئاسایش و بەرگریی پەرلەمان، میوانداریی ژمارەیەک لە فەرماندە ئەمنی و سەربازییە پسپۆڕەکانی کردووە، لەوانە: فەرماندەی هێزی دەریایی، فەرماندەی سنووری ناوچەی چوارەم، فەرماندەی لیوای سنووری کەناراوەکان، فەرماندەی بنکەی دەریایی ئوم قەسر، بەڕێوەبەری ئۆپراسیۆنە دەریاییەکان و بەڕێوەبەری هەواڵگریی دەریایی، لەگەڵ ژمارەیەک ئەفسەری دیکە. فەرماندەکان ڕاپۆرتێکی وردیان لەبارەی وردەکارییەکانی ڕووداوەکە، ڕێکارە گیراوەبەرەکان، میکانیزمی دابینکردنی ئاسایش بۆ ئاوە هەرێمییەکان و ناوچەکانی ڕاوکردن و پاراستنی ڕاوچییە عێراقییەکان پێشکەش کرد."
ڕاگەیەندراوەکە ئاماژەی بەوەش کردووە: "دانیشتنەکە گفتوگۆی چڕوپڕی بەخۆیەوە بینی و بەرپرسە سەربازی و ئەمنییەکان ئەنجامە سەرەتاییەکانی لێکۆڵینەوەکانیان خستە ڕوو، کە تێیدا خاڵەکانی کەمتەرخەمی و کەمورتییەکان بە ڕوونی دەستنیشان کران؛ هاوکات لیژنەکە جەختی لە پێویستیی تەواوکردنی لێکۆڵینەوەکان و گرتنەبەری ڕێکاری یاسایی دژی هەر کەسێک کردەوە کە کەمتەرخەمییەکەی دەسەلمێنرێت، تاوەکو بەپێی یاسا ڕەوانەی دادگای تایبەتمەند بکرێت."
هەر بەپێی ڕاگەیەندراوەکە: "لیژنەکە گوێی لە تێبینی و داواکارییەکانی شێخ و پیاوماقوڵانی پارێزگای بەسرە و کەسوکاری شەهیدەکە گرت، کە کۆمەڵێک داواکارییان سەبارەت بە پاراستنی ڕاوچییە عێراقییەکان، بەهێزکردنی ڕێکارە ئەمنییەکان لە ناوچەکانی ڕاوکردن و گەرەنتیی دووبارەنەبوونەوەی ڕووداوی لەو شێوەیە خستە ڕوو. لای خۆشیانەوە کەسوکاری قوربانییەکە و ئامادەبووان ستایشی ڕۆڵی لیژنەی ئاسایش و بەرگریی پەرلەمانیان کرد بۆ پەرۆشییان لە بەدواداچوونی ئەم دۆسیەیە بە هەستێکی بەرزی نیشتمانییەوە.
لیژنەی ئاسایش و بەرگری، بەگوێرەی ڕاگەیەندراوەکە، جەختی کردەوە کە ئەنجومەنی نوێنەران وەک "ماڵی گەل" پابەندە بە پاراستنی سەروەریی عێراق و پاراستنی کەرامەتی هاووڵاتییان؛ ئاماژەی بەوەش کرد کە "خوێنی عێراقییەکان بەرپرسیارێتییەکی نیشتمانییە و نابێت بە هیچ شێوەیەک کەمتەرخەمیی تێدا بکرێت یان سازشی لەسەر بکرێت." لیژنەکە جەختیشی کردەوە کە ئەم دۆسیەیە لە ژێر چاودێری و بەدواداچوونی ڕاستەوخۆدا دەمێنێتەوە لەگەڵ سەرۆکایەتیی ئەرکانی سوپا، وەزارەتەکانی بەرگری و دەرەوە و لایەنە پەیوەندیدارەکان، تاوەکو چارەسەری هەموو ئەو کێشانە دەکرێت کە لە دانیشتنی میواندارییەکەدا دەرکەوتوون.
ڕاگەیەندراوەکە ئاماژەی بەوەش کردووە، کۆبوونەوەکە بە چەند ڕاسپاردە و بڕیارێک کۆتایی هات، لەوانە: داواکاری لە وەزارەتی بەرگری بۆ ئەنجامدانی ڕێکارەکان تاوەکو (نەجم عەبدوڵا خالید تەمیمی) بە فەرمی وەک شەهید بناسرێت، هەروەها حکومەت خەرجیی چارەسەری بریندارەکان بگرێتە ئەستۆ و قەرەبووی ماددی و مەعنەوییان بکاتەوە. جگە لەوەش، جەخت کرایەوە لەسەر بەهێزکردنی ڕێکارە ئەمنییەکان بۆ پاراستنی ڕاوچییەکان و بەردەوامیی هەماهەنگی لە نێوان هێزی دەریایی، فەرماندەیی ئۆپراسیۆنەکانی بەسرە و پاسەوانی سنوور بۆ ڕێکخستنی جووڵەی ڕاوچییەکان و ڕێگریکردن لە دووبارەبوونەوەی ڕووداوی لەو شێوەیە، لەگەڵ تەواوکردنی لێکۆڵینەوەکان و سزادانی هەر کەسێک کە کەمتەرخەمیی تێدا سەلمێندراو بێت.
هەر بەپێی ڕاگەیەندراوەکە، لیژنەکە بڕیاری داوە ڕاسپاردە و بڕیارەکانی بەرز بکاتەوە بۆ سەرۆکایەتیی ئەنجومەنی نوێنەران، تاوەکو لە یەکێک لە دانیشتنەکاندا بخوێنرێتەوە و ڕێکاری پێویستیان لەبارەوە بگیرێتە بەر؛ ئەمەش بە ئامانجی کاراکردنی ڕۆڵی چاودێریی پەرلەمان و مسۆگەرکردنی جێبەجێکردنی بڕیارەکان لەلایەن دەسەڵاتی جێبەجێکردنەوە، بۆ بەدیهێنانی دادپەروەری بۆ کەسوکاری شەهید و بریندارەکان.
لە کۆتایی ڕاگەیەندراوەکەدا هاتووە، لیژنەی ئاسایش و بەرگری دووپاتی کردەوە کە بەردەوام دەبێت لە بەدواداچوونی ئەم دۆسیەیە تاوەکو هەموو ڕێکارە یاسایی و جێبەجێکارییەکان تەواو دەبن، و گەرەنتیی لێپرسینەوە لە کەمتەرخەمەکان دەکرێت، لەگەڵ گرتنەبەری هەموو هەنگاوێک بۆ ڕێگریکردن لە هەر دەستدرێژی و پێشێلکارییەک کە ڕاوچییە عێراقییەکان بکاتە ئامانج، بە جۆرێک کە مافی هاووڵاتییان و شکۆی دەوڵەت و سەروەریی یاسا بپارێزرێت.