بەغدا – INA
وەزارەتی نەوت، ئەمڕۆ پێنجشەممە، گرێبەستێکی لەگەڵ کۆمپانیای (سينوبك - Sinopec)ی چینی واژۆ کرد، بە مەبەستی ئەنجامدانی ڕووپێوی بوومەلەرزەیی بۆ ناوچەی"عەدان" لە پارێزگای موسەننا.
لە ڕاگەیەندراوێکی وەزارەتدا کە بۆ ئاژانسی هەواڵی عێراقی (INA)نێردراوە، هاتووە: "لەژێر چاودێریی باسم محەمەد خوزەیر، وەزیری نەوت و بە ئامادەبوونی نەسیر عەزیز، بریکاری وەزارەت بۆ کاروباری دەرهێنان؛ کۆمپانیای گەڕان و پشکنینی نەوتی، گرێبەستێکی لەگەڵ کۆمپانیای سینۆپێکی چینی واژۆ کرد، بۆ جێبەجێکردنی کارەکانی ڕووپێوی بوومەلەرزەیی دوو ڕەهەندی (2D) لە چوارچێوەی بەرنامەی ناوچەی گەڕان و پشکنینی عەدان لە پارێزگای موسەننا."
نەسیر عەزیز، بریکاری وەزارەتی نەوت بۆ کاروباری دەرهێنان، جەختی کردەوە کە ئەم گرێبەستە لەگەڵ پلانەکانی وەزارەتدا یەکانگیرە بۆ فراوانکردنی کارەکانی گەڕان و پشکنین لەو بلۆکە نوێیانەی چاوەڕوان دەکرێت بڕێکی باشی هایدرۆکاربۆنیان تێدا بێت. ئاماژەی بەوەش کرد کە بەکارهێنانی نوێترین تەکنەلۆژیای جیهانی لەم ڕووپێوییانەدا، دەبێتە هۆی بەهێزکردنی بنکەدراوە جیۆلۆجییەکان و زیادکردنی یەدەگی نەوت و غازی وڵات.
لای خۆشییەوە، ئۆسامە ڕەئوف حوسێن، بەڕێوەبەری گشتیی کۆمپانیای گەڕان و پشکنینی نەوتی، ڕایگەیاند کە جێبەجێکردنی ئەم بەرنامەیە هەنگاوێکی گرنگە لە پەرەپێدانی پڕۆسەکانی دۆزینەوەی نەوت لە ناوچەی "عەدان" و دابینکردنی زانیاریی ورد بۆ پڕۆسەکانی پەرەپێدانی داهاتوو.
جێی ئاماژەیە، ناوچەی "عەدان" یەکێکە لە ناوچە گرنگەکانی گەڕان و پشکنین و دەکەوێتە بیابانی بادیەی پارێزگای موسەننا لە باشووری عێراق.