بەغدا – INA– محەمەد تاڵبی
وەزارەتی نەوت، ئەمڕۆ پێنجشەممە، جەختی کردەوە کە پڕۆسەی بارکردنی نەوت لە بەندەرەکانی باشووری وڵات بەردەوامە و هیچ جۆرە وەستانێک ڕووی نەداوە.
سەلیم ڕیکابی، وتەبێژی وەزارەتی نەوت، لە لێدوانێکدا بۆ ئاژانسی هەواڵی عێراقی (INA) ڕایگەیاند: "ئەو هەواڵانەی لە هەندێک لاپەڕە و کەناڵی تەلەفزیۆنییەوە بڵاوکراونەتەوە سەبارەت بە وەستانی بارکردنی نەوتی عێراق لە بەندەرەکانی باشوور بەهۆی کەوتنی درۆنێک بەسەر یەکێک لە کەشتییە نەوتهەڵگرەکاندا، دوورن لە ڕاستییەوە."
ڕیکابی ئاماژەی بەوەش کرد: "پڕۆسەکانی بارکردنی نەوت لە بەندەرەکانی باشوور بەردەوامن و هیچ وەستانێک لە ئارادا نییە"؛ ڕوونیشیکردەوە کە کۆمپانیای بەبازاڕکردنی نەوتی عێراق (سۆمۆ) خەریکی لێکۆڵینەوەیە لە کەوتنی "تەنێکی نامۆ" بەسەر یەکێک لە کەشتییەکاندا، و هەر کاتێک لێکۆڵینەوەکان تەواو بوون، ئەنجامەکەی بۆ ڕای گشتی ڕادەگەیەنرێت.