بەغداد – INA
فەرهاد ئەمین ئەترووشی، جێگری سەرۆکی ئەنجومەنی نوێنەرانی عێراق، ئەمڕۆ پێنجشەممە، یادی بەڕێوەچوونی یەکەمین دانیشتنی پەرلەمانی عێراقی لە ١٦ی تەممووزی ساڵی ١٩٢٥ بەرز ڕاگرت و جەختی لەوە کردەوە کە ئەم یادە هاندەرێکە بۆ بەهێزکردنی هاوبەشیی نیشتمانی و بنیاتنانی عێراقێکی یەکگرتوو و ئارام.
لە ڕاگەیەندراوێکی نووسینگەی ڕاگەیاندنی جێگری سەرۆکی ئەنجومەنی نوێنەراندا، کە بۆ ئاژانسی هەواڵی عێراقی (INA) نێردراوە، هاتووە: "فەرهاد ئەمین ئەترووشی شانازیی خۆی بە یادی بەڕێوەچوونی یەکەمین دانیشتنی پەرلەمانی عێراق لە ١٦ی تەممووزی ١٩٢٥ دەربڕی، کە لە چوارچێوەی (ئەنجومەنی ئوممە)دا بەڕێوەچوو و بەردی بناغەی نوێنەرایەتیکردنی گەل و ئیرادەی نیشتمانی و چەسپاندنی دەستووری ئەو کاتەی عێراقی دانا."
ڕاگەیەندراوەکە ئاماژەی بەوەش کردووە کە پەرلەمان لەو سەردەمەدا لە هەردوو ئەنجومەنی نوێنەران و پیران پێکهاتبوو، کە بەیەکەوە یەکەمین سیستەمی پەرلەمانیی هەڵبژێردراویان لە مێژووی عێراقدا پێکهێنا.
جێگری سەرۆکی ئەنجومەن ئاماژەی بەوە کرد کە ئەم ڕۆژە ڕەنگدانەوەی قووڵایی ئەزموونی سیاسیی عێراقە و جەختیشی کردەوە کە "کورد ئامادەییەکی دیار و کاریگەری لەو ئەزموونەدا هەبووە."
لە کۆتاییدا هاتووە کە یادکردنەوەی ئەم بۆنەیە، هاندەرێکە بۆ بەهێزکردنی هاوبەشیی نیشتمانی، پابەندبوون بە دیموکراسی و سەروەریی یاسا، بە مەبەستی بنیاتنانی عێراقێکی یەکگرتوو، سەقامگیر و گەشەسەندوو.