بەغداد – INA
ئەمانەتی بەغداد، ئەمڕۆ چوارشەممە ڕایگەیاند: لە داهاتوویەکی نزیکدا دەست دەکات بە فرۆشتنی زەوییە کشتوکاڵییەکان و گۆڕینیان بۆ نیشتەجێبوون، هاوکات ئاماژەی بەوەدا: کە دروستکردنی خانوو لە ناوچە کشتوکاڵییەکاندا دوای دەرچوونی بڕیاری ژمارە (320)ی ساڵی (2022) بە ناڕەسمی و پێشێلکاریی یاسایی دادەنرێت.
وتەبێژی ئەمانەتەكە عودەی جەندیل، بە ئاژانسی هەواڵی عێراقی ڕاگەیاند: "ئەمانەتی بەغداد لەم نزیکانەدا دەست دەکات بە فرۆشتنی زەوییە کشتوکاڵییەکان و گۆڕینیان بۆ نیشتەجێبوون بەپێی بڕیاری ژمارە 320ی ساڵی 2022"، ڕوونیشیکردەوە: "ئەم هەنگاوە دوای بەدواداچوونی ڕاستەوخۆی ئەمینداری بەغداد و سەرپەرشتیکردنی پرۆسەی گۆڕینی ناوچە کشتوکاڵییەکان بۆ نیشتەجێبوون دێت."
ئەوەشی خستەڕوو: " ئەمانەت پێشتر دەستی کردبوو بە دابەشکردنی سەنەدات و ئێستاش بەردەوامە لە گۆڕینی زەوییە کشتوکاڵییەکان بۆ ناوچەی نیشتەجێبوون لە گەڕەکی 'ڕەباب' لە سنووری شارەوانیی 'مەعامیل'، کە تێیدا 750 خانووی نیشتەجێبوون بەپێی بڕیارەکە دەفرۆشرێنەوە بە نیشتەجێبووانیان"، ئاماژەی بەوەشدا: "لە کاتێکی نزیکدا مامەڵەکان تەواو دەکرێن و خانووەکان دەفرۆشرێن بەو کەسانەی تێیدا نیشتەجێن."
جەختیشیکردەوە: "بەدواداچوونێکی چڕوپڕ لەلایەن خودی ئەمینداری بەغدادەوە هەیە بۆ گۆڕینی ئەو زەوییە کشتوکاڵییانەی کە موڵکی شارەوانیی بەغدادن بۆ نیشتەجێبوون"، مژدەی ئەوەشیدا کە "دوای گۆڕینی ڕەگەزی زەوییەکان، شارەوانیی بەغداد بە شێوەیەکی فەرمی خزمەتگوزاریی هەمەلایەن پێشکەشی ئەم ناوچە گرنگانە دەکات بۆ بەدیهێنانی دادپەروەری بۆ چینە هەژارەکانی کۆمەڵگەی بەغداد."
وتیشی: " ئەمانەت بڕبڕەی پشتی ئەم پرۆسەیەی بڕیوە و یەکێکە لە یەکەم لایەنە حکومییەکان کە هەستاوە بە گۆڕینی ڕەگەزی زەوییە کشتوکاڵییەکان بۆ نیشتەجێبوون و جێبەجێکردنی بڕیاری 320."
لە درێژەی قسەکانیدا رایگەیاند: " ئەمانەت بەردەوامە لە ڕێوشوێنەکانی بۆ گۆڕینی تەواوی ناوچە کشتوکاڵییەکانی دیکەی سەر بە شارەوانیی بەغداد بۆ ناوچەی نیشتەجێبوون"، ڕوونیشیکردەوە: کە "دوای دەرچوونی بڕیاری 320ی ساڵی 2022، دروستکردنی خانوو لە ناوچە کشتوکاڵییەکاندا بە تەواوی و بە شێوەیەکی کۆتایی قەدەغەکراوە، و هیچ ڕەزامەندییەک نییە بۆ دروستکردنی یەکەی نیشتەجێبوون لە ناوچە کشتوکاڵییەکاندا."
ئەوەشی خستەڕوو:" ئەمانەتی بەغداد بە تەواوی دروستکردنی خانووی لە بەغداد ڕاگرتووە بە شێوازی دروستکردنی یەکەی نوێ لە ناوچە کشتوکاڵییەکاندا، بەو پێیەی لە کاتی دەرچوونی بڕیارەکەوە کارکردن بە تەواوی قەدەغەیە لەو ناوچانەدا بە مەبەستی پاراستنی ئەوەی لە زەوییە کشتوکاڵییەکانی بەغداد ماوەتەوە"، ڕوونیشیکردەوە: کە "لە ئێستادا هیچ ڕەزامەندییەک بۆ هیچ جۆرە ڕەگەز یان گرێبەستێک نادرێت، لەوانەش گرێبەستەکانی (25، 17، 35)، و دروستکردنی خانوو لەم ناوچانەدا نایاسایی و ناڕەسمییە."