بەغداد – INA
سەرۆکی دەستەی دەروازە سنوورییەکان فەریق عومەر عەدنان وەائیلی، ئەمڕۆ چوارشەممە، دەرکردنی 7 ڕاسپاردەی لە کاتی سەردانەکەیدا بۆ دەروازەی سنووریی شەیب لە پارێزگای میسان ڕاگەیاند، بە مەبەستی دەستەبەرکردنی ئاسانکاری لە هاتوچۆی زیارەتكاران و پێشکەشکردنی باشترین خزمەتگوزاری پێیان.
دەستەکە لە بەیاننامەیەکدا كە بۆ ئاژانسی هەواڵی عێراقی ناردووە، دەڵێت: "سەرۆکی دەستەی دەروازە سنوورییەکان، فەریق عومەر عەدنان وەائیلی، سەردانی پارێزگای میسانی کرد، بە هاوڕێیەتی جێگری فەرماندەی ئۆپەراسیۆنە هاوبەشەکان و سەرۆکی لیژنەی باڵای سەردانە ملیۆنییەکان، فەریقی یەکەمی ڕوکن قەیس محەمەداوی، و جێگری بەڕێوەبەری نووسینگەی سەرۆکی ئەنجومەنی وەزیران و سەرۆکی لیژنەی خزمەتگوزاری، عەلی ڕەزووقی لامی."
بەیاننامەکە راشیگەیاند: "ئەم سەردانە بە مەبەستی ئاگاداربوون لە دواین ئامادەکارییەکان بووە بۆ پێشوازیکردن لە زیارەتكارانی چلەی ئیمام حسێن (سەلامی خوای لێبێت) لە ڕێگەی دەروازەی سنووریی شەیب، و بەدواداچوون بۆ پلانی ڕێکخستن و هەماهەنگی کە لە ماوەی وەرزی سەردانەکەدا جێبەجێ دەکرێت."
سەرۆکی لیژنەی باڵای سەردانە ملیۆنییەکان جەختی لەسەر "گرنگی دیاریکردنی بەرپرسیارێتییەکان و بەهێزکردنی هاوکاری و هەماهەنگی نێوان هەردوو لایەنی ئەمنی و خزمەتگوزاری کردەوە، لەگەڵ بەکارهێنانی سەرجەم توانا و سەرچاوەکان بۆ سەرخستنی ئەم بۆنە ملیۆنییە، بە شێوازێک کە ئاسانکاری لە هاتوچۆی زیارەتكاران بکات و باشترین خزمەتگوزارییان پێشکەش بکات."
لای خۆشییەوە، وەائیلی "میکانیزمەکانی ئاسانکردنی هاتوچۆ و پلانی داڕێژراوی دەستەی دەروازە سنوورییەکانی بۆ سەرخستنی سەردانەکە ڕوون کردەوە"، و جەختی لە "پشتیوانیکردنی كاروانەكانی حسێنی و ئامادەکردنی خزمەتگوزارییە پێویستەکان کردەوە، لەگەڵ پێشکەشکردنی هەموو جۆرە پاڵپشتییەک بۆ ئەو ڕۆڵە گرنگەی دەیگێڕن لە خزمەتکردنی زیارەتكاران لە ماوەی ڕێوڕەسمەکانی سەردانی چلەدا."
ئاماژەی بەوەشکرد: "دەستەکە بەردەوامە لە جێبەجێکردنی پلانی تایبەت بە سەردانی چلە، بە هەماهەنگی لەگەڵ لایەنە ئەمنی، خزمەتگوزاری و فەرمانگە پاڵپشتیکارەکان، لە پێناو جێبەجێکردنی ڕێنماییەکانی حکومەت، بە شێوازێک کە ڕەوتی ڕێکارەکان ئاسان بکات و بە بەرزترین ئاستی ڕێکخستن و کارامەیی پێشوازی لە زیارەتكاران بکرێت."
بەیاننامەکە رونیكردەوە کە گرنگترین ئەو ڕاسپاردانەی دەستەی دەروازە سنوورییەکان دەریکردوون، ئەمانەی خوارەوە لەخۆدەگرن:
1. پەیڕەکردنی بەڕێکردنی زیارەتكاران بە شێوازی دەستەدەستە: بە هەماهەنگی نێوان دەروازە عێراقی و ئێرانییەکان، بۆ ڕێگریکردن لە قەرەباڵغی و پاڵەپەستۆ.
2. هەماهەنگی لەگەڵ لیژنەی خزمەتگوزاری بۆ دابینکردنی هۆکاری گواستنەوە بە ژمارەی پێویست، بەجۆرێک یارمەتیدەر بێت لە پێشکەشکردنی باشترین خزمەتگوزاری بە زیارەتكاران و ئاسانکردنی گەیشتنیان بە پارێزگا پیرۆزەکان.
3. پاڵپشتیکردنی دەروازە سنوورییەکان بە کارمەندی زیاتر و هەماهەنگی لەگەڵ بەڕێوەبەرایەتی گشتی پاسپۆرت بۆ کردنەوەی ژمارەیەکی زیاتری کابینەکانی پاسپۆرت، بە مەبەستی خێرا ڕاپەڕاندنی ڕێکارەکان و ڕوونەدانی دواکەوتن.
4. بەهێزکردنی مەفرەزەکانی پشکنین: بەتایبەتی کادیرانی ئافرەت.
5. ڕێگەدان بە هەڵدانی كاروانەكانی حسێنی: لە ناوەوە و دەرەوەی دەروازە سنوورییەکان، بەپێی سروشت و ڕووبەری هەر دەروازەیەک، بۆ پێشکەشکردنی خزمەتگوزاری و پێداویستییە سەرەکییەکان بە زائران.
6. پێکهێنانی مەفرەزەی ڕێنماییکردن: و پێشکەشکردنی هاوکاری پێویست بە زیارەتكاران.
7. ڕێنماییکردنی سەرجەم دەروازە سنوورییەکان بۆ دەستپێکردنی ئەرکەکانیان لەگەڵ چوونەناووەی یەکەم زیارەتكار بۆ عێراق و کۆتایی هاتنی بە چوونەدەرەوەی دواین زیارەتكار: و کارکردن بەپێی بنەمای خۆڕاگری و گۆڕینی ئێشکگرییەکان لە کارەکاندا، بۆ دەستەبەرکردنی بەردەوامیی پێشکەشکردنی خزمەتگوزارییەکان بە درێژایی ڕۆژانی سەردانە پیرۆزەکە و پاراستنی ئاستی ئەدا.
بەیاننامەکە جەختیکردەوە: "ئەم ڕاسپاردانە لەسەر بنەمای ڕێنماییەکانی فەرماندەی گشتی هێزە چەکدارەکان دەرکراون، کە جەختی لەسەر پێویستی جیاوازبوونی سەردانی چلەی ئەمساڵ کردووەتەوە بەراورد بە سەردانەکانی پێشوو لە ڕووی ئاستی خزمەتگوزاری، ئاسانکاری و ڕێکارەکانەوە، بە شێوازێک کە یارمەتیدەر بێت لە ئاسانبوونی هاتوچۆی زائران و دەستەبەرکردنی تێپەڕبوونیان بە سەلامەتی و ڕەزامەندی تەواو."