بەغداد – INA
ئەمڕۆ سێشەممە، جێگری بەڕێوەبەری نووسینگەی سەرۆک وەزیران و سەرۆکی لیژنەی باڵای خزمەتگوزاریی زیارەتە ملیۆنییەکان، عەلی ڕەزووقی لامی، جەختی لەسەر گرنگیی چڕکردنەوەی هەوڵەکان و بەگەڕخستنی سەرجەم تواناکان کردەوە بۆ پێشکەشکردنی باشترین خزمەتگوزاری بە زیارەتکارانی ئیمام حوسێن (سەلامی خوای لێبێت).
نووسینگەی ڕاگەیاندنی جێگری بەڕێوەبەری نووسینگەی سەرۆک وەزیران و سەرۆکی لیژنەی باڵای خزمەتگوزاریی زیارەتە ملیۆنییەکان، عەلی ڕەزووقی لامی، لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "لە پێناو جێبەجێکردنی فەرمانی سەرۆک وەزیران، و ڕێنمایی بەڕێوەبەری نووسینگەی سەرۆک وەزیران و سەرۆکی لیژنەی باڵای زیارەتە ملیۆنییەکان، لەسەر پێویستیی پێشکەشکردنی باشترین خزمەتگوزاری بۆ زیارەتی چلەی ئیمام حوسێن (سەلامی خوای لێبێت)، لامی بە هاوڕێیەتی فەرماندەی گشتی قەیس محەمەداوی، سەرۆکی لیژنەی باڵای ئەمنیی زیارەتە ملیۆنییەکان، سەردانێکی مەیدانیی بۆ پارێزگای دیالە ئەنجامدا."
وتیشی: "لە فەرماندەیی ئۆپەراسیۆنەکانی دیالەدا بە ئامادەبوونی لایەنە پەیوەندیدارەکان کۆبوونەوەیەک سازکرا بۆ تاوتوێکردنی پلانە ئەمنی و خزمەتگوزارییەکانی تایبەت بە زیارەتەکە،" ئاماژەی بەوەش کرد کە "لە کۆبوونەوەکەدا جەخت لەسەر گرنگیی چڕکردنەوەی هەوڵەکان و هەماهەنگیی کارەکان لە نێوان سەرجەم فەرمانگە پەیوەندیدارەکاندا کرایەوە، لەگەڵ ڕاسپاردنیان بۆ بەگەڕخستنی ئەوپەڕی تواناکانیان بە مەبەستی پێشکەشکردنی باشترین خزمەتگوزاری بە زیارەتکارانی ئیمام حوسێن (سەلامی خوای لێبێت)، و دابینکردنی تەواوی پێداویستییە پێویستەکان بۆ موکێب و خێوەتگە خزمەتگوزارییەکان، بە شێوازێک کە بەشدار بێت لە سەرخستنی پلانی زیارەتەکەدا."
نووسینگەکە ئاماژەی بەوەش کردووە کە "شاندەکە سەردانی دەروازەی سنووریی مەنزەریەی کرد بۆ لەنزیکەوە ئاگاداربوون لە ڕەوشی کارکردن و ئامادەکارییە بەردەوامەکان، دواتریش کۆبوونەوەیەکی بەرفراوانیان لەگەڵ نوێنەرانی کۆماری ئیسلامیی ئێران ئەنجامدا، کە تێیدا ڕێککەوتن لەسەر چەند بابەتێکی گرنگ کرا کە دەبنە هۆی سەرخستنی زیارەتەکە و ئاسانکاریی هاتنی زیارەتکارانی ئێرانی و بیانی و موکێبە خزمەتگوزارییەکان بۆ ناو خاکی عێراق."
لای خۆیەوە، لایەنی ئێرانی "سوپاس و پێزانی خۆی دەربڕی بۆ ئەو بایەخە پێشەنگەی کە حکومەتی عێراق، بە سەرۆکایەتی سەرۆک وەزیران عەلی فالح زەیدی، پێشکەشی دەکات لە ڕێگەی دابینکردنی ئاسانکاری و یارمەتی بۆ سەرخستنی ڕێوڕەسمی زیارەتەکە،" هاوكات ستایشی "هەوڵەکانی حکومەت و گەلی عێراقی کرد لە خزمەتکردنی زیارەتکارانی ئیمام حوسێن (سەلامی خوای لێبێت)."