وەزارەتی ژینگە پاککردنەوەی ٤٠٠٠ کیلۆمەتر دووجا لە مین تا ئێستا ڕادەگەیەنێت

بەغداد – INA – ئامنە سەلامی

ئەمڕۆ سێشەممە، وەزارەتی ژینگە پاککردنەوەی زیاتر لە ٤٠٠٠ کیلۆمەتر دووجای لە مین ڕاگەیاند، هاوکات گرێبەستکردنی لەگەڵ هەر کۆمپانیایەک بۆ لادانی مین ڕەتکردەوە.

مستەفا حەمید مەجید، بەڕێوەبەری بەشی هۆشیاری و ڕاگەیاندن لە فەرمانگەی کاروباری مینی سەر بە وەزارەتی ژینگە، بە ئاژانسی هەواڵی عێراقی (INA)ی ڕاگەیاند: "تێکڕای ئەو ڕووبەرەی کە لە دوای ساڵی ٢٠٠٣وە (کە ساڵی دامەزراندنی فەرمانگەی کاروباری مینە) بە مین و پاشماوە جەنگییەکان پیس ببوو، گەیشتبووە نزیکەی (٦٧٩٣) کیلۆمەتر دووجا، لە کاتێکدا لە ئێستادا تەنها (٢٧٣٨) کیلۆمەتر دووجا ڕووبەری پیسبوو ماوەتەوە."

ئاماژەی بەوەش کرد کە "نزیکەی نیوەی ئەو ڕووبەرە ماوانە دەکەوێتە پارێزگای بەسڕە،" ڕوونیشی کردەوە کە "ئەو ئامارانەی لە تۆڕە کۆمەڵایەتییەکان و میدیاکاندا دەربارەی ژمارەی قوربانیان بڵاوکراونەتەوە ناڕاستن، چونکە ئەو ژمارەیەی لەلایەن فەرمانگەکامانەوە پشتڕاستکراوەتەوە بریتییە لە (٣٥,٤١٣) قوربانی، نەک (٥٠,٠٠٠) وەک ئەوەی باس دەکرێت."

مەجید ڕاشیگەیاند: "ئەوەی دەگوترێت لەسەر هەبوونی گرێبەستی فەرمانگەی کاروباری مین لەگەڵ کۆمپانیا ناوخۆیی یان بیانییەکان ناڕاستە،" جەختیشی کردەوە کە "فەرمانگەکە هیچ گرێبەستێک واژۆ ناکات، بەڵکو تەنها ئەرکی سەرپەرشتیکردن و چاودێریکردنی کارەکانی پاککردنەوە و لادانی مینی لەسەر شانە بەپێی پێوەرە نیشتمانییە پەسەندکراوەکان، لە کاتێکدا ئەو لایەنە سوودمەندانەی وەک وەزارەتەکانی نەوت، کارەبا و گواستنەوە خۆیان ڕاستەوخۆ گرێبەستەکان واژۆ دەکەن."

مەجید لە کۆتاییدا داوای کرد کە "وردبینی و بابەتیبوون پەیڕەو بکرێت لە گواستنەوەی زانیارییەکانی تایبەت بە دۆسیەی مین، بەهۆی هەستیاری و مەترسییە مرۆییەکانی ئەم بابەتە."