نێودەوڵەتی – INA
ئیدارەی دۆناڵد ترەمپ، سەرۆکی ئەمریکا، داوای لە ئێران کردووە کە ئەمڕۆ شەممە بەیاننامەیەکی گشتی بڵاوبکاتەوە و تێیدا ددان بەوەدا بنێت کە گەرووی هورمز کراوەیە، لەگەڵ پابەندبوون بە ڕاگرتنی تەقەکردن لە کەشتییە بازرگانییەکان، ئەمەش بەپێی ئەوەی پێگەی "ئەکسیۆس" لە بەرپرسانی ئەمریکییەوە گواستوویەتیەوە.
بەرپرسانی ئەمریکی ڕایانگەیاندووە کە واشنتن چاوەڕوان دەکات ئێران بەیاننامەکە لە دوای ئەو کۆبوونەوەیە بڵاوبکاتەوە کە بڕیارە ڕۆژی شەممە لە سوڵتاننشینی عومان بەڕێوەبچێت.
بەرپرسێکی ئەمریکی ئاماژەی بەوەش کردووە، سەرۆک ترەمپ دەرفەت و کاتێکی سنوورداری بە تیمی دانوستانکار لەگەڵ ئێران بەخشیوە بۆ گەیشتن بە ڕێککەوتنێکی ئەتۆمی، و ڕوونی کردووەتەوە کە پلانگەلێکی ئامادەکراو هەن کە ئەو بژاردانە لەخۆدەگرن کە لەبەردەم سەرۆکدا دەبن لە ئەگەری نەگەیشتن بە ڕێککەوتن.
ئەو بەرپرسە جەختیشی کردووەتەوە کە ئەگەر ئێران ڕەتیبکاتەوە بەیاننامە داواکراوەکە بڵاوبکاتەوە، ئەوا ڕووبەڕووی "لێکەوتەی زۆر توند" دەبێتەوە.