بەغداد - INA
بانکی ناوەندی، ئەمڕۆ چوارشەممە، ڕێنماییەکانی خۆی بۆ ڕێکخستنی بەشی نەختی دراوی بیانی بۆ گەشتیاران دەرکرد.
نووسینگەی ڕاگەیاندنی بانکەکە لە بەیاننامەیەکدا کە بۆ ئاژانسی هەواڵی عێراقی ناردووە، دەڵێت: "ڕێنماییەکان دیاریکردنی سەقفی بەشی نەختی بۆ گەشتیاری پێگەیشتوو بە بڕی (2000) دۆلاری ئەمریکی مانگانە لەخۆگرتووە، لەبری (3000) دۆلار، ئەمەش لە چوارچێوەی پەرەپێدانی بەڕێوەبردنی پرۆسەکانی فرۆشتنی نەختی دراوی بیانی، و بەرزکردنەوەی کارایی دابەشکردنی سەرچاوەکان، بە شێوازێک کە لەگەڵ باشترین شێوازە بانکییە نێودەوڵەتییەکاندا بگونجێت".
راشیگەیاند: "ئەم ڕێوشوێنە لە چوارچێوەی کۆمەڵێک چاکسازیی ڕێکخستندایە کە بانکی ناوەندی جێبەجێی دەکات، بە ئامانجی دەستەبەرکردنی گەیشتنی دراوی بیانی بۆ هەمووان، بە جۆرێک کە بەشداربێت لە بەهێزکردنی سەقامگیری بازاڕی نەختینەیی و بەرزکردنەوەی کارایی بەڕێوەبردنی سەرچاوەکان".
بانکەکە جەختیکردەوە: "ئەم ڕێوشوێنانە تەنها ڕێکخستنین، لە چوارچێوەی پرۆسەی بەهێزکردنی تواناکانی بانکەکە بۆ ڕووبەڕووبوونەوەی گۆڕانکارییە ئابوورییەکان بە کارایی و بەردەوامی، و هاوتەریببوون لەگەڵ پێشهاتە جیهانییەکان لە سیستمی دراوەکاندا، ئەویش لە ڕێگەی هاندانی بەکارهێنانی کارتەکانی پارەدانی ئەلیکترۆنی، چ کارتی قەرز بێت یان کارتی پێشەکی دابینکراو، وەک ئامرازێکی سەرەکی و ئارام بۆ دابینکردنی خەرجییەکانی گەشتکردن بۆ دەرەوەی عێراق، ئەمەش نەرمی و ئاسانکاریی زیاتر بۆ هاوڵاتیان دابین دەکات، و پرۆسەی گۆڕانکاری بەرەو ئابووری دیجیتاڵی بەهێز دەکات، و لەگەڵ پێوەرە بانکییە نێودەوڵەتییە هاوچەرخەکاندا دەگونجێت، بە شێوازێک کە پاڵپشتی متمانە بە کەرتی بانکی بکات و خزمەت بە بەرژەوەندیی باڵای ئابووری وڵات بگەیەنێت".