بەغداد – INA
عەبدولکەریم عەبتان جبووری، وەزیری پەروەردە، ئەمڕۆ سێشەممە لەگەڵ ئەلێکساندرۆس ماکاریگاکیس، بەڕێوەبەری نووسینگەی یونسکۆ لە عێراق، تاوتوێی فراوانکردنی هاوبەشیی نێوانیانی کرد بە مەبەستی پەرەپێدانی خوێندن و گونجاندنی دەرئەنجامەکانی لەگەڵ بازاڕی کاردا.
وەزارەت لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "عەبدولکەریم عەبتان ئەلجبووری، وەزیری پەروەردە و سەرۆکی لیژنەی نیشتمانیی عێراقی بۆ پەروەردە، ڕۆشنبیری، زانست و کولتوور، پێشوازی لە ئەلێکساندرۆس ماکاریگاکیس، بەڕێوەبەری نووسینگەی یونسکۆ لە عێراق و شاندی هاوڕێی کرد، ئەمەش بە ئامادەبوونی مەجید ئەلشمەری، بەڕێوەبەری گشتیی پەیوەندییە ڕۆشنبیرییەکان و حەفزی ئەلحەلبووسی، بەڕێوەبەری نووسینگەی وەزیر".
ههروهها ئهوهیش هاتووه كه "لە دیدارەکەدا باسیان لە ڕێڕەوەکانی هاوکاریی هاوبەش کرد لە بواری پەرەپێدانی خوێندن، سیستمی بەڕێوەبردنی زانیارییەکان، کوالێتی خوێندن، ڕاهێنانی ستافەکان، و گونجاندنی مەنهەجەکانی خوێندن لەگەڵ گۆڕانکارییە جیهانییەکان و پێداویستییەکانی بازاڕی کاردا".
بەپێی راگهیندراوهكه، وەزیری پەروەردە جەختی کردووەتەوە کە "ڕێکخراوی یونسکۆ هاوبەشێکی ستراتیژیی وەزارەتە لە جێبەجێکردنی بەرنامەکانی چاکسازیی پەروەردەییدا"، ئاماژەی بەوەش داوە کە "قۆناغی ئێستا پێویستی بە فراوانکردنی ئاسۆکانی هاوکاریی هاوبەش هەیە بۆ هاوتەریببوون لەگەڵ گۆڕانکارییە جیهانییەکان لە کەرتی خوێندندا، پەرەپێدانی ژینگەی فێرکاری، و بەرزکردنەوەی کوالێتی دەرئەنجامەکانی خوێندن بە جۆرێک کە لەگەڵ پێداویستییەکانی گەشەپێدان و بازاڕی کاردا بگونجێت"، هاوكات دووپاتی کردەوە کە "وەبەرهێنان لە خوێندندا بنەمای سەرەکییە بۆ بنیاتنانی مرۆڤ و دەوڵەت".
لای خۆشیەوە، بەڕێوەبەری نووسینگەی یونسکۆ "تێڕوانینی ڕێکخراوەکەی بۆ پشتگیریکردنی ئەولەویەتەکانی وەزارەتی پەروەردە" خستە ڕوو، و جەختی لەسەر "بەردەوامیی هاوکارییەکان لە جێبەجێکردنی پڕۆژە هاوبەشەکاندا کردەوە، کە لە پێشەنگیاندا: خوێندنی کوالێتی بەرز و دادپەروەرانە، چاکسازی لە خوێندن و ڕاهێنانی تەکنیکی و پیشەییدا، باشترکردنی دەستڕاگەییشتن بە خوێندنی گشتگیر، و وانەوتنەوە لە پێناو داهاتوودا، ئەمە جیا لە تاوتوێکردنی نوێکردنەوەی پڕۆژەی پاڵپشتیکردنی دەرفەتی کاری گەنجان و فراوانکردنی بوارەکەی بۆ ئەوەی پارێزگایەکی تریش بگرێتەوە".