بەغدا – INA – حەسەن فەواز
ئەمڕۆ دووشەممە، فەرمانگەی ئاوەڕۆی بەغدا، پشتبەستنی بە نوێترین تەکنەلۆژیا بۆ پاڵاوتنی ئاوی قورس (ئاوەڕۆ) و بەکارهێنانەوەی لە کەرتی کشتوکاڵدا ڕاگەیاند، هاوکات ئاماژەی بەوەدا کە پڕۆژە نوێیەکان خزمەتگوزارییەکانی ئاوەڕۆی تەندروستی بۆ زیاتر لە 85 لەسەد تاوەکو کۆتایی ساڵی 2027 بەرز دەکەنەوە.
بەڕێوبەری فەرمانگەی ئاوەڕۆ لە پارێزگای بەغدا، فیراس عەبدوڵا، بە ئاژانسی هەواڵی عێراقی (INA)ی ڕاگەیاند: "بەڕێوبەرایەتیی ئاوەڕۆی پارێزگای بەغدا، کار دەکات بۆ پاراستنی ژینگە لە ڕێگەی جێبەجێکردنی تۆڕەکانی ئاوەڕۆی قورس و تۆڕەکانی بەڕێکردنی ئاوی باران، بە جۆرێک ئەم تۆڕانە تایبەتمەندن بەوەی لە یەکتر جیاکراونەتەوە، کاتێک ئاوی باران بە شێوازێکی سەربەخۆ لە ئاوی قورس بەڕێ دەکرێت".
ئاماژەی بەوەشکرد: "ئاوی قورس دەگوازرێتەوە بۆ وێستگەکانی پاڵاوتن و پاشان دەڕژێندرێتە ناو ڕووبارەکان یان جۆگەکانی ئاوەڕۆ ، لەکاتێکدا ئاوی باران، بەهۆی ئەوەی سروشتەکەی پاکە، ڕاستەوخۆ دەڕژێندرێتە ناو جۆگەکان یان ڕووبارەکانەوە".
ئاماژەی بەوەشکرد: "پارێزگای بەغدا لە ئێستادا پێنج وێستگەی پاڵاوتنی لە ناوچەکانی حوسێنییە، زوھور، مەحموودییە، مەدائین و پردی دیالە تێدایە، سەرەڕای هەبوونی پڕۆژەی تر کە لە قۆناغی جێبەجێکردندان، و لەگەڵ تەواوبوونیاندا ژمارەی وێستگەکانی پاڵاوتن بۆ زیاتر لە دە وێستگە بەرز دەبێتەوە"، و ڕوونی کردەوە کە "ڕێژەی ئەو ناوچانەی لە ئێستادا خزمەتگوزارییان پێگەیشتووە لە چوارچێوەی بەرپرسیارێتیی پارێزگای بەغدادا 35%ە، و چاوەڕوان دەکرێت لەگەڵ تەواوبوونی سەرجەم پڕۆژەکانی قۆناغی جێبەجێکردندا لە کۆتایی ساڵی 2027 بۆ زیاتر لە 85% بەرز ببێتەوە".
ڕایگەیاند کە "فەرمانگەکە بە بەردەوامی بەدواداچوون بۆ کارەکانی سەنتەرەکان لە قەزا و ناحیەکاندا دەکات، و حاڵەتەکانی سەرپێچی دەستنیشان دەکات کە خۆی لە بەستنەوەی ئاوی قورسی هەندێک لە خانوو و یەکەکانی نیشتەجێبوون بە تۆڕەکانی بەڕێکردنی ئاوی بارانەوە دەبینێتەوە، کاتێک ئاگادارکردنەوە دەدرێتە خاوەنەکانیان بۆ لادانی سەرپێچییەکە و بەستنەوەی بە تۆڕە دروستەکەوە"، هاوکات جەختیشی کردەوە کە "وێستگەکانی پاڵاوتن کۆڵەکەی سەرەکین بۆ پاراستنی ژینگە و کەمکردنەوەی پیسبوون، چونکە ئاوی پیسبوویان تێدەچێت و دوای پاڵاوتن بە کەڵکی بەکارهێنان لە کەرتی کشتوکاڵدا دێت، ئەمەش بە فەزڵی پشتبەستن بە نوێترین تەکنەلۆژیا و هۆکارە ژینگەییەکان لە چارەسەرکردن و پاڵاوتنی ئاوی قورسدا".