بەدواداچوون - INA
ئەستێرەی بەئەزموونی بەڕازیلی، نەیمار جۆنیۆر، هێرشبەری یانەی سانتۆس، وازهێنانی خۆی لە یاریی نێودەوڵەتی ڕاگەیاند دوای ئەوەی هەڵبژاردەی وڵاتەکەی ماڵاوایی لە ڕکابەرییەکانی جامی جیهانی کرد.
نەیمار دوای دۆڕانیان بە ئەنجامی ١ - ٢ لە بەردەم نەرویج ڕایگەیاند: "من هەوڵم دا، و بەردەوامیش بووم لە هەوڵدان"، ئاماژەی بەوەشکرد کە"من کاروانی وەرزشیی خۆم لێرە لە یاریگای مێتلایف دەستپێکرد، و هەر لێرەش کۆتایی پێهات. ئێستا هەموو شتێک کۆتایی هات".
بەم شێوەیە نەیمار (تەمەن ٣٤ ساڵ) پەردەی لەسەر کاروانێکی نێودەوڵەتی لادا کە ١٦ ساڵ لەمەوبەر دەستی پێکردبوو، کە تێیدا ٨٠ گۆڵی تۆمارکرد و ٥٩ گۆڵیشی دروستکرد لە کۆی ١٣٠ یاریی نێودەوڵەتیدا.
ئەم ئەستێرە بەئەزموونە وەک دووەمین یاریزان کە زۆرترین بەشداریی بە درێسی بەڕازیلەوە هەبێت ماڵاوایی لە هەڵبژاردەی وڵاتەکەی دەکات، و هاوکات گۆڵکاری مێژووییە کە توانیویەتی پێش ئەفسانەی کۆچکردوو پێلێ بکەوێت.
نەیمار نەیتوانی کۆنترۆڵی فرمێسکەکانی خۆی بکات دوای چوونەدەرەوەی هەڵبژاردەی وڵاتەکەی لە پاڵەوانێتی جامی جیهانیی ٢٠٢٦ کە لە ویلایەتە یەکگرتووەکانی ئەمریکا، کەنەدا و مەکسیک بەڕێوەدەچێت.
بەڕازیلییەکان، کە ٥ جار بوونەتە پاڵەوانی جیهان و دواهەمینیان لە مۆندیالی ٢٠٠٢ی کۆریای باشوور و یابان بوو، ماڵاواییان لە ڕکابەرییەکانی پاڵەوانێتییەکە کرد دوای دۆڕانیان بە ئەنجامی ١ - ٢ لە بەردەم نەرویج لە چوارچێوەی یارییەکانی قۆناغی ١٦دا.
نەیمار یارییەکەی لەسەر کورسیی یەدەگ دەستپێکرد، و لە خولەکی ٦٧دا وەک جێگرەوە لە شوێنی گابریێل مارتینێلی، یاریزانی یانەی ئارسناڵی ئینگلیزی هاتە ناو یاریگاوە.