بەغدا – INA
وەزارەتی ئاوەدانکردنەوە و نیشتەجێکردن، ئەمڕۆ هەینی بەردەوامیی کارەکانی لە پڕۆژەکانی نەهێشتنی جەنجاڵی هاتوچۆ لە بەغدا ڕاگەیاند و ئاماژەی بەوە کرد کە ٨٠٪ی ئەو پڕۆژانە تەواو کراون.
نەبیل سەفار، وتەبێژی وەزارەت بە ئاژانسی هەواڵی عێراقی (INA)ی ڕاگەیاند: "کارکردن لەو بەشانەی کە ماون لە پڕۆژەکانی نەهێشتنی جەنجاڵی لە چوارچێوەی هەردوو وەجبەی یەکەم و دووەم بەردەوامە، بەتایبەتی ئەو پردانەی بەسەر ڕووباری دیجلەدا دەپەڕنەوە، وەک: پردی غەزە لە زەعفەرانییە، پردی دووەمی جادەرییە، پردی دووەمی سەرافییە، پڕۆژەی بەستنەوەی پردی موعەلەق بە پردی دوو نهۆمی، و پڕۆژەی پردی کرێعات."
ئاماژەی بەوەش کرد کە تەواوکردنی ئەم پڕۆژانە ڕووبەڕووی هەندێک ئاستەنگی دارایی و کەمیی نەختینە بووەتەوە، ئەمەش بووەتە هۆی دواکەوتنیان لەو کاتەی بۆیان دیاریکرابوو. وتیشی: "کۆی گشتیی پڕۆژەکانی نەهێشتنی جەنجاڵی لە هەردوو وەجبەکەدا ٢٢ پڕۆژەن، کە تا ئێستا ١٣ پڕۆژەیان بەتەواوی کۆتاییان هاتووە و ٦ پڕۆژەی تریش کە بەشێکن لە پڕۆژە گەورەکان تەواو کراون، بەمەش ڕێژەی جێبەجێکردن گەیشتووەتە ٨٠٪."