بەغدا - INA
عەدنان فەیحان دولەیمی، جێگری یەکەمی سەرۆکی ئەنجومەنی نوێنەران، جەختی کردەوە کە کارنامەی پەرلەمانی لە خولەکانی پێشوو بەتەواوی جیاواز دەبێت. ڕوونیشیکردەوە کە سەرۆکایەتی و ئەندامانی ئەنجومەنی نوێنەران بەرەنگاربوونەوەی گەندەڵییان خستووەتە پێشینەی ئەولەویەتە چاودێرییەکانیان و کاردەکەن بۆ چالاککردنی ڕۆڵی لێژنە پەرلەمانییە تایبەتمەندەکان لە بەدواداچوون و چاودێریکردنی ئەدای دەزگا چاودێرییەکان.
نووسینگەی ڕاگەیاندنی جێگری یەکەمی سەرۆکی ئەنجومەنی نوێنەران لە ڕاگەیەندراوێکدا، کە بۆ ئاژانسی هەواڵی عێراقی (INA) نێردراوە، ڕایگەیاند: "عەدنان فەیحان دولەیمی ئاماژەی بەوە کردووە کە وەرزی نوێی یاسادانان وەرچەرخانێکی جۆری لە ئەدای یاسادانان و چاودێریدا بەخۆوە دەبینێت؛ بە جۆرێک خشتەی کارەکانی دانیشتنەکان تەرخان دەکرێن بۆ دانیشتنی گوێگرتن و تاووتوێکردنی ئەدای وەزارەتەکان، دەستەکان و دامەزراوە چاودێرییەکان، لەگەڵ تاووتوێی بەرنامە و پلانە پەرەپێدەرەکانی داهاتوویان، تا ببێتە پێوەرێکی سەرەکی بۆ چاودێری و هەڵسەنگاندن."
فەیحان، بەپێی ڕاگەیەندراوەکە، ڕوونیکردەوە کە سەرۆکایەتی و ئەندامانی پەرلەمان بەرەنگاربوونەوەی گەندەڵی و چالاککردنی ڕۆڵی لێژنە پسپۆڕەکانیان کردووەتە کاری لەپێشینە، ئەمەش "بووەتە داواکاری و شایستەیەکی نیشتمانی کە بەرگەی دواخستن ناگرێت و ناتوانرێت خەمساردی تێدا بکرێت، تاوەکو پاراستنی سامانی گشتی و لێپرسینەوە لە تێوەگلاوان بەبێ جیاکاری دەستەبەر بکرێت."
هەروەها جەختی کردەوە کە "بەرەنگاربوونەوەی گەندەڵی پێویستی بە کرداری ڕاستەقینە و مەیدانی هەیە، نەک ئەو دروشم و بەیاننامانەی کە زۆربەی جار ببوونە پەردەیەک و هۆکارێک بۆ تەشەنەسەندنی زیاتری گەندەڵی."
لە کۆتاییدا ئاماژەی بەوە کرد کە ئەنجومەنی نوێنەران ڕێگە نادات هیچ گەندەڵکارێک لە لێپرسینەوە پارێزراو بێت، هەر پۆست و پلە و ئینتیمایەکی هەبێت، تا دەگاتە گەڕاندنەوەی پارە تاڵانکراوەکان و چەسپاندنی سەروەریی یاسا، بە جۆرێک کە متمانەی هاووڵاتیان بە دامەزراوەکانی دەوڵەت بەهێز بکات و ببنە گەواهی ئەوەی کە بەرەنگاربوونەوەی گەندەڵی بووەتە بژاردەیەکی کرداری و تەنها دروشم نییە.