فەرەنسا ـ INAـ یوسف تەڵاڵ
کەشناسیی فەرەنسا، ئەمڕۆ هەینی، ئامادەکارییەکانی بۆ ڕووبەڕووبوونەوەی شەپۆلێکی نوێی گەرما لەگەڵ دەستپێکی پشووی کۆتایی هەفتە ڕاگەیاند، کە پێشبینی دەکرێت پلەکانی گەرما بە شێوەیەکی پلەبەندی بەرز ببنەوە.
پەیامنێری ئاژانسی هەواڵی عێراقی (INA) ڕایگەیاند: "فەرەنسا لە پشووی کۆتایی ئەم هەفتەیەوە ئامادەکاری بۆ شەپۆلێکی نوێی گەرما دەکات، بەپێی نوێترین پێشبینییەکان، پلەکانی گەرما وردە وردە بەرز دەبنەوە و ڕۆژی دووشەممە دەگەنە لوتکە، کە ڕەنگە لە هەندێک ناوچەی باشووری ڕۆژئاوای وڵاتەکە بگاتە ٤٢ پلەی سەدی."
ئاماژەی بەوەش کرد کە "چاوەڕوان دەکرێت ناوچەکانی باشوور بەرزترین پلەی گەرما تۆمار بکەن، بە جۆرێک کە ڕۆژی یەکشەممە لە هەرێمی (لاند) بگاتە ٣٨ پلە و لە ناوچە ناوخۆییەکانی (فار) بگاتە ٣٩ پلە، پێش ئەوەی لە سەرەتای هەفتەی داهاتوودا لە چەند ناوچەیەکی باشووری ڕۆژئاوا ٤٠ پلە تێپەڕێنێت. هەروەها لە پاریس پلەی گەرما دەگاتە ٣٥ پلە و لە ناوەڕاستی (بریتانی) دەگاتە ٣٦ پلە."
جەختی لەوەش کردەوە کە "پێشبینییەکان ئاماژە بە بەردەوامبوونی کەشوهەوای وشک لە زۆربەی ناوچەکانی وڵات دەکەن، لەگەڵ نەبوونی باران، ئەمەش مەترسیی بەردەوامبوونی شەپۆلی گەرما و ئاگرکەوتنەوە لە دارستانەکان زیاد دەکات." ئاماژەی بەوەش کرد کە کەشناسی هێشتا چاودێری ئەگەری گەیشتنی شەپۆلەکە بە ناوچەکانی باکوور لە ڕۆژانی داهاتوودا دەکات.