بەغدا - INA
وەزارەتی دەرەوەی عێراق، ئەمڕۆ پێنجشەممە، سەرکۆنە و ئیدانەی توندی خۆی بۆ ئەو تەقینەوە تیرۆریستییە دەربڕی کە دیمەشقی پایتەختی سووریای هەژاند.
وەزارەتەکە لە ڕاگەیەندراوێکدا، کە بۆ ئاژانسی هەواڵی عێراقی (INA) نێردراوە، ڕایگەیاندووە: "بە توندترین شێوە سەرکۆنە و ئیدانەی ئەو تەقینەوە تیرۆریستییە دەکەین کە کافتریایەکی لە دیمەشقی پایتەختی سووریا کردە ئامانج و بووە هۆی گیانلەدەستدانی ژمارەیەک هاووڵاتیی بێتاوان و برینداربوونی چەندانی دیکە."
هەروەها ئاماژەی بەوە کردووە: "پرسە و سەرەخۆشیی قووڵی خۆمان ئاراستەی حکومەت و گەلی برای سووریا و بنەماڵەی قوربانیان دەکەین و هیوای چاکبوونەوەی خێراش بۆ هەموو بریندارەکان دەخوازین."
وەزارەتەکە جەختی لە "هاوسۆزیی تەواوی کۆماری عێراق لەگەڵ کۆماری عەرەبیی سووریا لەم بارودۆخە پڕ لە ئازارەدا" کردەوە و ڕایگەیاند: "بە توندی هەموو جۆرە کارێکی تیرۆریستی ڕەت دەکەینەوە کە هاووڵاتیانی سڤیل و شوێنە گشتییەکان دەکەنە ئامانج، کە ئەمە پێشێلکارییەکی ئاشکرای بەها مرۆییەکان و یاسا نێودەوڵەتییەکانە.