بریکاری ئەستێرەکەی چێڵسی دەرگای پەیوەندیکردنی یاریزانەکە بە ڕیاڵ مەدرید واڵا دەکات

بەدواداچوون – INA

خافێر باستۆری، بریکاری کارەکانی ئینزۆ فێرناندێزی ئەرجەنتینی و ئەستێرەی یانەی چێڵسی، دەرگای بۆ ڕۆیشتنی یاریزانەکە بەرەو ڕیاڵ مەدرید لە هاوینی ئەمساڵدا واڵا کرد.

باستۆری بە ڕۆژنامەی "مارکا"ی ڕاگەیاندووە: "ئێمە لێکۆڵینەوە لە ئەگەری ڕۆیشتنی ئینزۆ فێرناندێز لە چێڵسی لەم هاوینەدا دەکەین، بەڵام تا ئێستا هیچ شتێکی مسۆگەر یان کۆتایی لەگەڵ هیچ یانەیەکدا نییە."

وتیشی: "ئێستا یاریزانەکە بە ئارامی تەنها بیر لە هەڵبژاردەی ئەرجەنتین دەکاتەوە، ئەو لە جامی جیهانیدا یاری دەکات و زۆر نزیکە لە سەرکەوتن بۆ قۆناغی ١٦.. تەنها بیر لەوە دەکاتەوە."

باستۆری جەختی کردەوە کە ئینزۆ سەرسامە بە مەدرید و وتی: "چەندین هاوڕێی لەوێ هەیە و هاوڕێیەکی زۆر نزیکی جولیان ئەلڤارێزە."

ئەم یاریزانە تەمەن ٢٥ ساڵە، یەکێکە لەو ناوانەی بۆ وەرزی داهاتوو بەربژێرە بۆ پەیوەندیکردن بە ڕیاڵ مەدرید، بەتایبەت دوای ئەو ستایشە گەورەیەی بۆ یانەکە و شارەکە کردوویەتی، ئەمەش وای کردووە بکەوێتە ژێر تیشکی چاوەکان.

بێگومان ئەنجامدانی گرێبەستەکە ئاسان نابێت، چونکە یاریزانەکە تا ساڵی ٢٠٣٢ گرێبەستی لەگەڵ چێڵسی هەیە. بەپێی هەندێک ڕاپۆرت، یانە لەندەنییەکە داوای نزیکەی ١٤٠ ملیۆن یۆرۆ دەکات، کە ئەمە بڕە پارەیەکە ڕیاڵ مەدرید نایەوێت بیدات.