بەغداد - INA - ئەحمەد فەرایجی
ئەمڕۆ چوارشەممە، ئەنجومەنی نیشتمانیی هۆز و عەشیرەتەکانی عێراق پشتگیری خۆی بۆ هەوڵەکانی سەرۆک وەزیران و دەسەڵاتی دادوەریی عێراق لە دژایەتیکردنی گەندەڵی و گێڕانەوەی دارایی گشتی ڕاگەیاند، و داوای لێپرسینەوەی لە تەواوی ئەو کەسانە کرد کە دەستیان هەبووە لە دزینی سامانی گشتیدا.
شێخ نەعیم سوهێل سەرۆکی ئەنجومەنی نیشتمانیی هۆز و عەشیرەتەکانی عێراق بە ئاژانسی هەواڵی عێراقی ڕاگەیاند: "ئەنجومەنەکە کۆنگرەیەکی نیشتمانیی بۆ پشتگیریکردن لە هەڵمەتە گەورەکەی دژایەتیکردنی گەندەڵی ڕێکخستووە، لەژێر دروشمی (هۆز و عەشیرەتەکانی عێراق دەنگێکی نیشتمانیی یەکگرتوون لە پێناو عێراقێکدا کە دادپەروەری تێیدا باڵادەست بێت، سەرچاوەکانی نیشتمانی تێدا بپارێزرێت و هیچ شوێنێکی بۆ گەندەڵی تێدا نەبێت)".
وتیشی: "ئەو پرۆسەیەی كۆتایی کە حکومەت بۆ دژایەتیکردنی گەندەڵی دەستی پێکردووە، هەنگاوێکە کە ماوەیەکی درێژ بوو چاوەڕوانی دەکرا، و وەڵامدانەوەیەکە بۆ ئەو داواکارییانەی کە مەرجەعیەتی ئایینی، جەماوەری عێراق و گەنجانی عێراق لە ماوەی چەندین ساڵی ڕابردوودا بەرزیان کردبووەوە".
ئاماژەی بەوەشکرد: "پشتگیریکردنی ئەم ڕێکارانە بووەتە ئەرکێکی نیشتمانی"، و جەختی لەسەر "پشتیوانیکردنی ئەنجومەنەکە بۆ دەسەڵاتی دادوەریی عێراق بە سەرۆکایەتی فایق زەیدان سەرۆکی ئەنجومەنی باڵای دادوەری، و هەروەها پشتگیریکردنی حکومەت لە جێبەجێکردنی فەرمانەکانی دەستگیرکردن دژ بە تۆمەتبارانی دۆسیەکانی گەندەڵی" کردەوە، و جەختیشی لەسەر "گرنگی بەردەوامبوونی ئەم ڕێکارانە کردەوە بە شێوازێک کە هاوکار بێت لە چاککردنی بارودۆخی وڵاتدا".
لەلایەکی دیکەوە، عەدنان دەنبوس شێخی هۆزی کینانە بە ئاژانسی هەواڵی عێراقی ڕاگەیاند: "شێخانی عەشیرەتەکان و ڕۆڵەکانی گەلی عێراق پشتیوانی ئەو ڕێکارانەن کە ئامانجیان لێپرسینەوەیە لە گەندەڵکاران و گێڕانەوەی سامانی گشتییە"، و داوای کرد کە "تەواوی ئەو کەسانەی تێوەگلاون لە دۆسیەکانی گەندەڵیدا، بەبێ جیاوازی و بەبێ گوێدانە پۆست و ناونیشانیان، بیانگرێتەوە لە هەڵمەتی بەرەبەیان، و ڕەوانەی دادگا بکرێن بۆ ئەوەی سزای خۆیان بەپێی یاسا وەربگرن".