بەغدا – INA
ئەمڕۆ دووشەممە، دەستەی گشتیی گومرک، پووچەڵکردنەوەی هەوڵێکی قاچاخچێتی بە (24) کارتی (ڤیزا کارت) لەلایەن گەشتیارێکی ژنەوە لە ناوەندی گومرکی فڕۆکەخانەی نێودەوڵەتیی بەغدا ڕاگەیاند.
لە ڕاگەیەندراوێکی دەستەکەدا کە دەستی ئاژانسی هەواڵی عێراقی (INA) کەوتووە، هاتووە: "بە ڕێنمایی ڕاستەوخۆی بەڕێوەبەری گشتیی دەستەی گشتیی گومرک ثامر قاسم داود، دەستەکە بەردەوامە لە هەوڵە چاودێرییە توندەکانی لە ناوەندە گومركییە سنوورییەکان و فڕۆکەخانەکاندا، ئەمەش لە ڕێگەی بەهێزکردنی ڕێکارەکانی پشکینین و وردبینی بۆ گەشتیاران و کەلوپەلەکانیان، بە شێوەیەک کە بەشدار بێت لە ڕێگریکردن لە هەوڵەکانی قاچاخچێتی و پاراستنی ئابووریی نیشتمانی، لەگەڵ پابەندبوونی تەواو بە جێبەجێکردنی یاسا و ڕێنماییە کارپێکراوەکان".
ڕوونیشی کردەوە: "ناوەندی گومرکی فڕۆکەخانەی نێودەوڵەتیی بەغدا توانی گەشتیارێکی ژن لە هۆڵی بەڕێکەوتنی سامەڕا دەستنیشان بکات کە بەنیازی گەشتکردن بوو بۆ دەوڵەتی ئیماراتی عەرەبیی یەکگرتوو، کە لە ئەنجامی پرۆسەی پشکنینی ورددا، دەست بەسەر (24) کارتی 'ڤیزا کارت'دا گیرا کە لە ژێر جلانیدا حەشاری دابوون، بە مەبەستی بردنە دەرەوەیان بە شێوازێکی پێچەوانەی ڕێسا و ڕێنماییەکان".
ڕاگەیەندراوەکە جەختی کردەوە کە "پرۆسەی دەستبەسەرداگرتنەکە بە هاوکاری لەگەڵ بەڕێوەبەرایەتیی ئاسایش و پاراستنی فڕۆکەخانەکان، و بە پاڵپشتیی پۆلیسی گومرک ئەنجامدرا، ئەمەش لە چوارچێوەی هەماهەنگیی هاوبەشی نێوان لایەنە پاڵپشتیکارەکاندا دێت، بە جۆرێک کە دەبێتە هۆی بەرزکردنەوەی کارامەیی ڕێکارە ئەمنی و گومركییەکان و سنووردارکردنی هەوڵەکانی قاچاخچێتی و پێشێلکردنی سیستم و ڕێنماییەکان".