دۆناڵد ترامپ، سەرۆکی ئەمەریکا شەوی چوارشەممە لە میانی بەشداری لە نمایش و ئاهەنگی 250 ساڵەی ڕاگەیاندی سەربەخۆی ئەمەریکا لە واشنتن گوتی" هەفتەی ڕابردوو ڕێککەوتنێکی مێژووییمان واژۆکرد بۆ کۆتاییهێنان بە ململانێکان لەگەڵ ئێران و هێشتنەوەی گەرووی هورمز بە کراوەیی، کارێکمان ئەنجامدا کە پێشتر هیچ سەرۆکێک نەیتوانیوە بیکات."
ئاماژەی بەوەشکرد، کۆماری ئیسلامی ئێران "هەرگیز نابێتە خاوەنی چەکی ئەتۆمی و کۆتایی هاتووە".
لە درێژەی قسەکانیدا سەرۆک ترامپ گوتی: "بەهۆی هێز و کارامەیی هێزە چەکدارەکانی ئەمەریکاوە، ئێران ئەمڕۆ نە هێزی دەریایی هەیە، نە هێزی ئاسمانی، نە توانای بەرگری ئاسمانی، نە مووشەکهاوێژ، نە توانای بەرهەمهێنانی سەربازی هەیە و سەرکردایەتییەکەی لەناوچووە."
ترەمپ ئاماژەی بەوەشکرد، بۆ یەکەمجار لە ماوەی سێ هەزار ساڵدا دواجار ئاشتی لە ڕۆژهەڵاتی ناوەڕاستدا بەرقەرار دەبێت. بڕیارە ئێمە ئاشتیمان لە ڕۆژهەڵاتی ناوەڕاست هەبێت."
سەرۆکی ئەمەریکا هەروەها ئاماژەی بە دابەزینی بەرچاوی نرخی نەوت و بەرزبوونەوەی بازاڕی بۆرسە کرد.
لە سەرەتای وتارەکەیدا سەرۆک کۆمار وتی "دوای 10 ڕۆژ وڵاتەکەمان ئاهەنگ دەگێڕێت بۆ یەکێک لە گرنگترین بەربەستەکانی مێژووی مرۆڤایەتی. ئێمە یادی 250 ساڵەی ئازادی شکۆمەندی ئەمریکا دەکەینەوە". "لە ساڵی 1776 باوکانی دامەزرێنەرمان لە فیلادلفیا کۆبوونەوە و جیهانیان بۆ هەمیشە گۆڕی بە ئەوەی بە جاڕنامەی سەربەخۆیی ناسراوە."
گوتیشی ئەمەریکا گەورەترین و بەهێزترین و سەرسوڕهێنەرترین وڵاتە کە جیهان ناسیبێتی و پێکەوە هەوڵ دەدەین گەورەتر و باشتر و بەهێزتر و سەرنجڕاکێشتری بکەین لە جاران..
سەرۆکی ئەمەریکا گوتیشی" ئەمڕۆ ئێمە بەهێزترین ئابووری جیهانمان هەیە، بەهێزترین سەربازی جیهانمان هەیە، پێشکەوتووترین تەکنەلۆژیای جیهانمان هەیە، دەوڵەمەندترین کولتوری جیهانمان هەیە و لە هەمووی گرنگتر باشترین کەسانی جیهانمان هەیە."
جەختیشی لەوە کردەوە کە ئەمەریکا لە دۆخێکی زۆر باشتردایە بە بەراورد بە دوو ساڵ لەمەوبەر. هەروەها باسی لە یاری نێوان ئەمەریکا و تورکیا کرد کە ڕۆژی پێنجشەممە ئەنجام دەدرێت و هیوای سەرکەوتنی بۆ هەڵبژاردەی ئەمەریکا خواست.
سەبارەت بە وزە، ترەمپ ڕایگەیاند کە ئەمەریکا نەوتی زیاتر بەرهەم دەهێنێت بە بەراورد بە ڕووسیا و سعودیە.
ئاماژەی بەوەشکرد، هەفتەی ڕابردوو کۆماری ئیسلامی "تەواو بووە"، گوتیشی ڤەنزوێلا لە ماوەی یەک کاتژمێردا کۆتاییهات و زیاتریش بەڕێوەن."
ترەمپ لە کۆتایی قسەکانیدا گوتی: "ئێمە هەرگیز بەو شێوەیە نەبووین کە ئەمڕۆ هەین، ئەمە دەستکەوتی ئێمەیە. ئەمە مێژووی ئێمەیە. وە ئەمە چارەنووسی ئەمەریکایە کە گەورەترین و شایستەترین نەتەوە بێت لەسەر زەوی."
ئاماژەی بەوەشکردووە، ئێمە یەک گەل و یەک نەتەوەین، لە ژێر ئاڵای ئەمەریکای گەورەدا بەرەو داهاتوویەکی شکۆمەند دەڕۆین کە خۆشمان دەوێت و لە ناخەوە ڕێزی لێدەگرین.
سەرۆک لە درێژەی وتەکانیدا گوتیشی"وە ئەمشەو، لەکاتێکدا خۆمان ئامادە دەکەین بۆ چوونە ناو 250 ساڵەی دامەزراندنی نەتەوەکەمانە، ئێمە جارێکی دیکە ئەمەریکا گەورە دەکەینەوە. جارێکی دیکە ئەمەریکا دەوڵەمەند دەکەینەوە. جارێکی دیکە ئەمەریکا تەندروست دەکەینەوە. جارێکی دیکە ئەمەریکا بەهێز دەکەینەوە. جارێکی دیکە شکۆمەندی بۆ ئەمەریکا دەگێڕینەوە. جارێکی دیکە ئەمەریکا پارێزراو دەکەینەوە. وە جارێکی دیکە ئەمەریکا گەورە دەکەینەوە... ڕۆژی لەدایک بوونت پیرۆز بێت، ئەمەریکا."
بڕیارە نمایش و ئاهەنگەکان بە بۆنەی 250 ساڵەی ڕاگەیاندی سەربەخۆی ئەمەریکا ماوەی 16 ڕۆژ بخایەنێت و سبەی ڕۆژی پێنجشەممە بەڕووی خەڵکدا دەکرێتەوە.