بەغداد – INA
سەرۆک کۆمار نزار ئامێدی، ئەمڕۆ سێشەممە، جەختی کردەوە کە سەرکەوتنی نێردەی حەج بە بەدەستهێنانی خەڵاتی (لبّيتم ) دەستکەوتێکە کە ڕەنگدانەوەی پەرۆشی عێراقە بۆ خزمەتکردنی میوانانی خودا.
فەرمانگەی ڕاگەیاندنی سەرۆکایەتی لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه: "سەرۆک کۆمار لە کۆشکی سەلام لە بەغداد، پێشوازی لە شێخ سامی مەسعوودی، سەرۆکی دەستەی حەج و عومرە و کادیرانی باڵای دەستەکە کرد."
ههروهها ئهوهیش هاتووه كه: "سەرۆک کۆمار ستایشی هەوڵەکانی دەستەکە و پەرۆشی کارمەندانی کرد بۆ خزمەتکردنی حاجیان، هەروەها بەشێک لە پەردەی کەعبەی پیرۆزی وەک دیاری لەلایەن سەرۆکی دەستەکەوە پێشکەش کرا، لە کۆبوونەوەکەشدا واقیعی کاری دەستەکە و ئەو پلان و بەرنامانەی کە کوالیتی ئەو خزمەتگوزارییانەی پێشکەشی دەکەن بەرز دەکەنەوە، خرانە ڕوو."
بەگوێرەی راگهیندراوهكه، سەرۆک کۆمار جەختی کردووەتەوە کە "سەرکەوتنی دەستەی حەج و عومرە بە بەدەستهێنانی خەڵاتی (لبّيتم) وەک باشترین نێردەی حەج لە نێوان نێردەی وڵاتانی ئیسلامیدا لە ڕووی ڕێکخستن و خزمەتگوزارییەوە بۆ چوارەم ساڵ لەسەریەک، دەستکەوتێکە کە پەرۆشی عێراق بۆ خزمەتکردنی میوانانی خودا بەرجەستە دەکات، و ڕەنگدانەوەی قەبارەی ئەو هەوڵانە و ئەو بەڕێوەبردنە پیشەییەی پێوە دیارە کە بووەتە جێی پێزانین."
لەلایەن خۆیەوە، مەسعوودی "سوپاس و پێزانینی خۆی بۆ سەرۆک کۆمار دەربڕی لەبەرامبەر پاڵپشتی و بایەخدانەکەی"، و جەختی کردەوە کە "دەستەکە بەردەوامە لە جێبەجێکردنی پلانە گەشەپێدەرەکانی و بەرزکردنەوەی ئاستی ئەدا و خزمەتگوزارییەکان، بە شێوەیەک کە دەستەبەرکردنی باشترین خزمەتگوزاری بۆ حاجیان و عومرەکارانی عێراقی مسۆگەر بکات، و پارێزگاری لە تۆماری ئەو سەرکەوتنانە بکات کە بە هەوڵی سەرجەم کارمەندانی دەستەکە و پشتیوانی دامەزراوەکانی دەوڵەت بەدی هاتوون."