بەغدا – INA
عەدنان فەیحان، جێگری یەکەمی سەرۆکی ئەنجومەنی نوێنەرانی عێراق، ئەمڕۆ پێنجشەممە، جەختی لە پێویستیی پشتگیریکردنی کارەکانی کۆمسیۆنی مافەکانی مرۆڤ و ڕەخساندنی زەمینەی گونجاو بۆ جێبەجێکردنی ئەرکەکانی کردەوە.
نووسینگەی ڕاگەیاندنی جێگری یەکەمی سەرۆکی پەرلەمان لە ڕاگەیەندراوێکدا، کە ئاژانسی هەواڵی عێراقی (INA) نێردراوە، ڕایگەیاند: فەیحان لە شوێنی حەوانەی خۆی، پێشوازی لە ئەندامانی کۆمسیۆنی باڵای مافەکانی مرۆڤ کرد. لە دیدارەکەدا بەدواداچوون بۆ گرنگترین دۆسیە مرۆییەکان کرا و تاوتوێی ئەو ڕێگایانە کرا کە دەبنە مایەی بەهێزکردنی هەماهەنگی نێوان دەسەڵاتی یاسادانان و کۆمسیۆن، بە مەبەستی چەسپاندنی بنەماکانی دادپەروەری و پاراستنی ماف و ئازادییە گشتییەکان.
بەگوێرەی ڕاگەیەندراوەکە، فەیحان ئاماژەی بە گرنگی ئەو ڕۆڵە جەوهەرییە دا کە کۆمسیۆن دەیگێڕێت لە چاودێریکردنی پێشێلکارییەکان و بەدواداچوونی پرسە مرۆییەکان؛ هەروەها جەختیشی کردەوە لەسەر پێویستیی پاڵپشتیکردنی کارەکانی کۆمسیۆن و تواناداکردنی بۆ ئەنجامدانی ئەرکەکانی بە سەربەخۆیی و پیشەیی، بە جۆرێک کە لەگەڵ دەستوور و ڕێککەوتننامە نێودەوڵەتییە پەیوەندیدارەکاندا هاوتەریب بێت و متمانەی هاووڵاتیان بە دامەزراوە نیشتمانییەکان بەهێزتر بکات.
لای خۆیانەوە، ئەندامانی کۆمسیۆنی باڵای مافەکانی مرۆڤ، دیارترین دۆسیە و ئەو ئاستەنگانەی ڕووبەڕووی کارەکانیان دەبنەوە خستە ڕوو، لەگەڵ ئەو هەوڵانەی لە بوارەکانی چاودێری، بەدۆکۆمێنتکردن و بڵاوکردنەوەی هۆشیاریی مافەکانی مرۆڤدا دەیدەن. هاوکات، ستایشی پشتگیرییەکانی ئەنجومەنی نوێنەرانیان کرد و جەختیان لە گرنگی بەردەوامیی هەماهەنگییەکان کردەوە بۆ پەرەپێدانی ژینگەی یاسایی و تەشریعی کە خزمەت بە پاراستنی مافەکانی مرۆڤ و چەسپاندنی دادپەروەری بکات.