جەماوەری عێراقی لە بۆستن متمانەی خۆیان بە هەڵبژاردەی نیشتمانی بۆ تێپەڕاندنی یەکەم کۆسپ دووپاتدەکەنەوە

بەدواداچوون - INA

جەماوەری عێراقی گەشبینی خۆیان نیشاندا بە بەردەوامبوونی هەڵبژاردەی نیشتمانیمان لە کێبڕکێکانی جامی جیهانی ٢٠٢٦، سەرەڕای دۆڕانی بەرامبەر هاوتا نەرویژییەکەی بە ئەنجامی (١-٤) لە دەستپێکی یارییەکانی کۆمەڵەی نۆیەمدا.

هاندەری عێراقی، فازڵ بەدری، دوای یارییەکە وتی: "ئەرکەکە قورس دەبێت، بەڵام ئێمە لێرەین لەپێناو خۆشی و لەپێناو عێراقدا، هەروەها بۆ پاڵپشتیکردنی وڵاتەکەمان، ئەزموونێکی نایاب بوو. لە تۆپی پێدا هەموو شتێک پێشبینیکراوە، ڕەنگە لە یارییەکانی داهاتوودا یەکسانبوون یان سەرکەوتن بەدەستبهێنین، ئێمە هێشتا زۆر گەشبینین بەوەی لە داهاتوودا دێت."

راشیگەیاند: "پێموابوو ئاستێکی باشتر پێشکەش دەکەین، بەڵام دۆڕان بەرامبەر هەڵبژاردەیەکی بەهێزی وەک نەرویج جێی سەرسوڕمان نییە. ئەوان یەکێک لە باشترین هێرشبەرەکانی جیهانیان هەیە، کاتێکیش لەبەردەم یاریزانانی لەم ئاستەدا تووشی هەڵە دەبیت، ئەوا دەرفەتەکە دەقۆزنەوە."

لەلایەکی دیکەوە، هاندەری عێراقی، لەیس هەلیل، پەیامێکی پاڵپشتی ئاراستەی شێرەکانی ڕافیدەین کرد و وتی: "پێویستە هەڵبژاردەکە بەردوام بێت لە پێشکەشکردنی باشترینەکانی، هەرچەندە ڕووبەڕووی هەڵبژاردەی بەهێز دەبێتەوە، بەڵام هێشتا دەرفەتەکە ماوە. دڵخۆش بووین بەوەی تیمەکە لە گێمی یەکەمدا پێشکەشی کرد، دەکرێت لە یارییەکانی داهاتووشدا ئەوە دووبارە ببێتەوە."

جەختیشیکردەوە: "پێویستە یاریزانان بەردەوام بن لە کارکردن و بەدوورگرتنی خۆیان لە هەڵەکان و ڕزگاربوون لە فشارەکان"، وتیشی: "ڕەنگە سێ هەڵبژاردە لەم کۆمەڵەیەدا سەربکەون، هێشتا ئومێد ماوە بۆ کێبڕکێکردن لەسەر یەکێک لە کارتەکانی پەڕینەوە بۆ قۆناغی داهاتوو."