هەمەڕەنگ – INA
توێژینەوەیەک کە لەلایەن توێژەرانی ویلایەتە یەکگرتووەکانی ئەمریکاوە ئەنجامدراوە، دەریخستووە کە بەرکەوتنی پێکانەکانی سەر ڕەنگە بە شێوەیەکی بەرچاو مەترسی گیانلەدەستدان بە شێرپەنجەی مێشک زیاد بکات.
توێژەران داتاکانی زیاتر لە ٢٠ هەزار نەخۆشیان لە ویلایەتە یەکگرتووەکانی ئەمریکا شیکردەوە کە لە ماوەی نێوان ساڵانی ١٩٨٧ تا ٢٠٢٤ تووشی زەبر و پێکانەکانی کاسەی سەر و مێشک بوون، پاشان ژمارەی مردن بە شێرپەنجەی مێشکیان لەم گرووپەدا بەراورد کرد لەگەڵ ڕێژە پێشبینیکراوەکان لە نێو گشتیی دانیشتواندا، بە ڕەچاوکردنی تەمەن، ڕەگەز، نەژاد و ماوەی بەدواداچوونەکە.
ئەنجامەکان دەریانخستووە ئەو کەسانەی تووشی زەبری سەر بوون، بە تێکڕا بە ڕێژەی ١.٧٥ هێندە زیاتر لە دۆخی ئاسایی لەژێر مەترسی گیانلەدەستداندابوون بە شێرپەنجەی مێشک. ئەم مەترسییە لە نێو ئەو کەسانەدا بەرزترین بووە کە بەهۆی فیشەکەوە تووشی پێکانی سەر بوون، بەو پێیەی ئەگەری گیانلەدەستدانیان بە وەرەمی مێشک زیاتر لە ١٤ هێندە بووە بە بەراورد بە کەسانی تر؛ هەروەها ڕێژەیەکی بەرز لە نێو ئەو کەسانەشدا تۆمارکراوە کە بەدەست جۆرە توندەکانی پێکانە سووکەکانی مێشکەوە دەناڵێنن.
توێژەران پێیان وایە هەوکردنی درێژخایەن کە دوای زیانگەیشتن بە شانەکانی مێشک بەهۆی پێکانەکانەوە دروست دەبێت و بۆ چەندین ساڵ بەردەوام دەبێت، ڕەنگە ڕۆڵێکی سەرەکی هەبێت لە ڕوونکردنەوەی ئەم ئەنجامانەدا. بۆیە پێویستە سەیری زەبرەکانی مێشک بکرێت نەک تەنها وەک کێشەیەکی کتوپڕ و حاد، بەڵکو وەک هۆکارێک کە ڕەنگە لەسەر مەودای درێژخایەن کاریگەری لەسەر تەندروستی هەبێت.
پێشتریش توێژینەوەیەک لەلایەن توێژەرانی پەیمانگای شێرپەنجە لە زانکۆی لەندەن (UCL) ئەنجامدرابوو، دەریخستبوو کە پێکانەکانی سەر ڕەنگە بەشداربن لە گەشەکردنی وەرەمی گلیۆما (Glioma)، کە جۆرێکی دەگمەن و هێرشبەری شێرپەنجەی مێشکە.
سەرچاوە: ئاژانسەکان