بەغداد – INA
لیژنەی کشتوکاڵ، سەرچاوە ئاوییەکان، زۆنگاوەکان و ژینگەی ئەنجومەنی نوێنەران، ئهمڕۆ دووشەممە، چەند ڕێکارێکی یاسایی و چاودێریی بۆ چارەسەرکردنی گرنگترین ئاستەنگە ژینگەییەکان ئاشکرا کرد.
بایز ئیسماعیل زراری، سەرۆکی تەمەنی لیژنەکە، لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "لیژنەکە پاکێجێک لە ڕێکاری یاسایی و چاودێری دەگرێتەبەر بۆ چارەسەرکردنی دیارترین ئاستەنگە ژینگەییەکان لە عێراقدا." جەختیشی کردەوە کە "مەلەفەکانی بەڕێوەبردنی پاشماوەکان، پشتێنەی سەوز، و غازی هاوڕێی نەوت (الغاز المصاحب) لە پێشەنگی کارە لەپێشینەکانی لیژنەکەدا دەبن لە خولی یاسادانانی داهاتوودا."
زراری ڕوونکردنەوەی دا کە "لیژنەکە بەردەوامە لە کارکردن بۆ تەواوکردنی یاسای بەڕێوەبردنی پاشماوە ڕەقە شارییەکان دوای تەواوکردنی خوێندنەوەی یەکەم بۆی، هاوڕێ لەگەڵ ئەنجامدانی هەموارکردن لەسەر یاسای پاراستن و چاککردنی ژینگە بە جۆرێک کە هۆشیاریی ژینگەیی بەرزبکاتەوە و دەسەڵاتی فراوانتر بداتە لایەنە جێبەجێکارەکان بۆ جێبەجێکردنی یاسا بەرکارەکان."
ئاماژەی بەوەش کرد کە "پلانێکی چاودێری ئامادەکراوە کە میوانداریکردنی بەرپرسانی پەیوەندیدار و ئەنجامدانی سەردانی مەیدانی لەخۆدەگرێت، بە مەبەستی بەدواداچوونی ئەدای حکومەت لە بوارەکانی پاراستنی ژینگە و ڕیسایکلینکردنی پاشماوەکاندا."
سەبارەت بە گۆڕانی کەشوهەوا، زراری داوای کرد مەلەفی ژینگە بخرێتە ناو کارە لەپێشینەکانی بەرنامەی حکومەتەوە، و ئاماژەی بەوە کرد کە "عێراق یەکێکە لەو وڵاتانەی کە زۆرترین کاریگەریی ئەم دیاردەیەی لەسەرە، ئەمەش پێویستی بە دابینکردنی تەرخانکراوە داراییە پێویستەکان هەیە بۆ دروستکردنی پشتێنەی سەوز و کەمکردنەوەی بیابانبوون، لە ڕێگەی هەماهەنگی نێوان لایەنە پەیوەندیدارەکان و وەبەرهێنانی سەرچاوە بەردەستەکان بۆ پاڵپشتیکردنی ئەم پڕۆژانە."
دووپاتیشی کردەوە کە "لیژنەکە تیشک دەخاتە سەر گرنگیی هێنانەکایەی هاوسەنگی لە نێوان فراوانبوونی شارنشینی و پاراستنی زەوییە کشتوکاڵییەکاندا، ئەویش لە ڕێگەی پابەندکردنی پڕۆژەکانی نیشتەجێبوونی وەبەرهێنان بە تەرخانکردنی ڕووبەری سەوزی گونجاو و ئاڕاستەکردنی وەبەرهێنان بەرەو ئەو زەوییانەی کە چاکسازییان تێدا نەکراوە."
لە کۆتاییدا جەختی لەسەر پێویستیی کۆتاییهێنان بە مەلەفی سووتاندنی غازی هاوڕێی نەوت کردەوە لە ڕێگەی جێگیرکردنی پێوەرە پابەندکەرەکان لە یاسا ژینگەییە نوێیەکاندا، بە جۆرێک کە بەشدار بێت لە کەمکردنەوەی کاریگەرییە تەندروستی و ژینگەییەکان و سوودوەرگرتنی باشتر لە سەرچاوە نیشتمانییەکان.